திருநெல்வேலி: திருநெல்வேலி மாவட்டம் பத்தமடை காவல் நிலையத்தில் தச்சு தொழிலாளி ஒருவர் தீக்குளிக்க முயன்ற சம்பவம் பெரும் பரபரப்பை ஏற்படுத்தியுள்ளது.
பத்தமடை பகுதியை சேர்ந்த சீனிவாசன் (42) என்பவர் தச்சு தொழில் செய்து வருகிறார். இவருக்கும் அண்டை வீட்டாருக்கும் இடையே நீண்ட நாட்களாக வழிப்பாதை தொடர்பான பிரச்சினை இருந்து வந்ததாக கூறப்படுகிறது.
இந்த விவகாரத்தில் வழிப்பாதையை சீரமைத்து தருமாறு பலமுறை சம்பந்தப்பட்ட அதிகாரிகளிடம் புகார் அளித்ததாகவும், ஆனால் எந்தவித நடவடிக்கையும் எடுக்கப்படவில்லை என்றும் கூறப்படுகிறது. இதனால் கடும் மனஉளைச்சலுக்கு ஆளான சீனிவாசன், பிரச்சினைக்கு தீர்வு கிடைக்காததால் விரக்தியடைந்திருந்ததாக தகவல்கள் தெரிவிக்கின்றன.
இந்த நிலையில், நேற்று பத்தமடை காவல் நிலையத்திற்கு சென்ற அவர், திடீரென தனது உடலில் பெட்ரோல் ஊற்றிக்கொண்டு காவல் நிலைய வளாகத்திற்குள் ஓடியுள்ளார். இதைக் கண்டு அதிர்ச்சியடைந்த போலீசார் உடனடியாக செயல்பட்டு அவரது உடலில் பற்றிய தீயை அணைத்தனர்.
இதையடுத்து காயமடைந்த சீனிவாசன் மீட்கப்பட்டு அருகிலுள்ள அரசு மருத்துவமனைக்கு சிகிச்சைக்காக அனுப்பி வைக்கப்பட்டார். அங்கு அவருக்கு தொடர்ந்து மருத்துவ சிகிச்சை அளிக்கப்பட்டு வருகிறது.
வழிப்பாதை பிரச்சினை தொடர்பாக அதிகாரிகள் நடவடிக்கை எடுக்காததால் ஏற்பட்ட மனவேதனையிலேயே இந்த முடிவை எடுத்ததாக முதற்கட்ட தகவல்கள் தெரிவிக்கின்றன.
இந்த சம்பவம் பத்தமடை பகுதியில் பெரும் பரபரப்பை ஏற்படுத்தியுள்ள நிலையில், சம்பவம் குறித்து போலீசார் விசாரணை நடத்தி வருகின்றனர்.
