சென்னை:
முதல்-அமைச்சர் விஜய்யின் பிறந்தநாள் கொண்டாட்ட நிகழ்வுகளில் அரசுப்பள்ளி மாணவர்கள் பயன்படுத்தப்பட்டதாக எழுந்துள்ள சர்ச்சை தமிழக அரசியலில் புதிய விவாதத்தை ஏற்படுத்தியுள்ளது. இந்த விவகாரம் தொடர்பாக தமிழக பாஜக தலைவர் நயினார் நாகேந்திரன் கடுமையான கண்டனத்தை பதிவு செய்துள்ளார்.
தனது எக்ஸ் சமூக வலைதள பக்கத்தில் வெளியிட்டுள்ள பதிவில், காஞ்சிபுரம் அருகே உள்ள ஜே.ஜே. நகர் அரசு ஊராட்சி நடுநிலைப்பள்ளி மாணவர்கள் பள்ளி நேரத்தில் வகுப்புகளை புறக்கணித்து, முதல்-அமைச்சர் விஜய்யின் பிறந்தநாள் நிகழ்ச்சிக்கு அழைத்துச் செல்லப்பட்டதாக வெளியாகியுள்ள தகவல்கள் கவலை அளிப்பதாக குறிப்பிட்டுள்ளார்.
அவர் வெளியிட்டுள்ள பதிவில், பள்ளி சீருடையுடன் மாணவர்களை அரசியல் நிகழ்ச்சிக்கு அழைத்துச் செல்லும் தைரியம் தவெக நிர்வாகிகளுக்கு எப்படி வந்தது என்று கேள்வி எழுப்பியுள்ளார். மேலும், அரசுப்பள்ளி மாணவர்களை கட்சி நிகழ்வுகளில் பயன்படுத்துவது ஏற்றுக்கொள்ள முடியாத செயல் என்றும் விமர்சித்துள்ளார்.
மாணவர்களிடம் கட்சிக் கொடிகள் கட்ட வைப்பது, பள்ளிக்குள் நுழைந்து பிறந்தநாள் பாடல்களை பாட வைப்பது, “விஜய் வாழ்க” என கோஷமிட வைப்பது போன்ற செயல்கள் நடைபெற்றதாக கூறப்படும் தகவல்களை சுட்டிக்காட்டிய நயினார் நாகேந்திரன், கல்வி பயிலும் குழந்தைகளை அரசியல் நடவடிக்கைகளில் ஈடுபடுத்த யாருக்கும் உரிமை இல்லை என்று தெரிவித்துள்ளார்.
“அரசுப்பள்ளி மாணவர்கள் என்ன உங்கள் அடிமைகளா?” என்ற கேள்வியை நேரடியாக எழுப்பிய அவர், மாணவர்களை பணியாட்கள் போல நடத்தும் மனப்பான்மை ஜனநாயகத்திற்கும் கல்வி அமைப்பிற்கும் எதிரானது என்று கூறியுள்ளார்.
மேலும், “எங்கள் வீட்டுப் பிள்ளைகளை வலுக்கட்டாயமாக உங்கள் பிறந்தநாளைக் கொண்டாட வைக்குமளவிற்கு நீங்கள் என்ன சுதந்திரப் போராட்டத் தியாகியா?” என்ற கேள்வியையும் அவர் தனது பதிவில் முன்வைத்துள்ளார்.
கடந்த சட்டமன்றத் தேர்தலின்போது சிறுவர்களை அரசியல் பிரசாரத்தில் பயன்படுத்தியதாக குற்றம்சாட்டிய அவர், தற்போது மீண்டும் மாணவர்களை அரசியல் நிகழ்வுகளில் பயன்படுத்துவதாக விமர்சனம் செய்துள்ளார். இதுபோன்ற நடவடிக்கைகளை பாஜக ஒருபோதும் ஏற்றுக்கொள்ளாது என்றும் தெரிவித்துள்ளார்.
இந்த விவகாரத்தில் சம்பந்தப்பட்டவர்கள் மீது உடனடியாக நடவடிக்கை எடுக்க வேண்டும் என்றும், இனி இதுபோன்ற சம்பவங்கள் நடைபெறாத வகையில் தவெக நிர்வாகிகளுக்கு தெளிவான அறிவுறுத்தல்கள் வழங்கப்பட வேண்டும் என்றும் நயினார் நாகேந்திரன் வலியுறுத்தியுள்ளார்.
இதற்கிடையில், காஞ்சிபுரம் பகுதியில் மாணவர்கள் பிறந்தநாள் நிகழ்ச்சிக்கு அழைத்துச் செல்லப்பட்டதாக வெளியான தகவல்கள் சமூக வலைதளங்களில் பரவலாக பேசப்பட்டு வருகின்றன. இதுகுறித்து அதிகாரப்பூர்வ விளக்கம் வெளியாகுமா என்ற எதிர்பார்ப்பும் நிலவி வருகிறது.
அரசியல் கட்சிகளின் நிகழ்வுகளில் மாணவர்களை பயன்படுத்துவது தொடர்பான விவாதம் தமிழகத்தில் மீண்டும் தீவிரமடைந்துள்ள நிலையில், இந்த விவகாரம் மேலும் அரசியல் பரபரப்பை ஏற்படுத்தியுள்ளது.
