சென்னை:
தமிழகத்தில் தனியார் பள்ளிகள் தங்களது கல்விக் கட்டண விவரங்களை பள்ளி வளாகங்களில் உள்ள அறிவிப்பு பலகைகளில் கட்டாயமாக வெளியிட வேண்டும் என்ற உத்தரவை எதிர்த்து தொடரப்பட்ட வழக்கில், சென்னை உயர்நீதிமன்றம் தீர்ப்பை தேதி குறிப்பிடாமல் ஒத்திவைத்துள்ளது.
தமிழகம் முழுவதும் செயல்பட்டு வரும் தனியார் பள்ளிகளில் வசூலிக்கப்படும் கல்விக் கட்டணங்கள் குறித்து பெற்றோர்கள் மற்றும் பொதுமக்கள் எளிதில் அறிந்து கொள்ளும் வகையில், அந்த விவரங்களை பள்ளிகளின் அறிவிப்பு பலகைகளில் வெளியிட வேண்டும் என்று தமிழ்நாடு மாநில தகவல் ஆணையம் கடந்த மே மாதம் உத்தரவிட்டது.
இந்த உத்தரவின் அடிப்படையில், தனியார் பள்ளிகள் இயக்குநரகம் ஜூன் 1-ஆம் தேதி அனைத்து தனியார் நர்சரி, தொடக்கப்பள்ளி, மெட்ரிக், சிபிஎஸ்இ மற்றும் பிற பாடத்திட்ட பள்ளிகளுக்கும் சுற்றறிக்கை அனுப்பியது. அதில், அரசால் நிர்ணயிக்கப்பட்ட கல்விக் கட்டண விவரங்களை ஜூன் 5-ஆம் தேதிக்குள் பள்ளி வளாகங்களில் பொதுமக்கள் பார்வைக்கு வைக்க வேண்டும் என அறிவுறுத்தப்பட்டது.
இந்த உத்தரவுக்கு எதிராக அகில இந்திய தனியார் கல்வி நிறுவனங்களின் சங்கம் சார்பில் அதன் பொதுச் செயலாளர் கே. பழனியப்பன் சென்னை உயர்நீதிமன்றத்தில் வழக்கு தொடர்ந்தார். தகவல் அறியும் உரிமைச் சட்டத்தின் கீழ் தனியார் கல்வி நிறுவனங்களை கட்டுப்படுத்த முடியாது என்றும், சிபிஎஸ்இ உள்ளிட்ட மத்திய கல்வி வாரியங்களின் கீழ் செயல்படும் பள்ளிகள் மீது மாநில அரசுக்கு நேரடி கட்டுப்பாடு இல்லை என்றும் மனுதாரர் தரப்பில் வாதிடப்பட்டது.
மேலும், தகவல் அறியும் உரிமைச் சட்டம் தனியார் கல்வி நிறுவனங்களுக்கு பொருந்தாது என்று உச்சநீதிமன்றம் ஏற்கனவே தீர்ப்பளித்திருப்பதாகவும், மாநில தகவல் ஆணையத்தின் உத்தரவு சட்டபூர்வமான அதிகார வரம்பை மீறுவதாகவும் தெரிவிக்கப்பட்டது.
இதற்கு பதிலளித்த தமிழக அரசு தரப்பு, தகவல் ஆணையத்தின் உத்தரவின் அடிப்படையில்தான் சுற்றறிக்கை வெளியிடப்பட்டதாக கூறியது. பள்ளி கட்டண விவரங்களை வெளியிடுவது வெளிப்படைத்தன்மையை உறுதி செய்யும் நடவடிக்கை என்றும், இந்த உத்தரவால் பாதிக்கப்பட்ட தனிப்பட்ட பள்ளிகளே வழக்கு தொடர முடியும்; சங்கம் சார்பில் வழக்கு தொடர்வது ஏற்கத்தக்கதல்ல என்றும் வாதிடப்பட்டது.
மேலும், கல்வி தொடர்பான விதிமுறைகளின் அடிப்படையில் பள்ளிகள் தங்களது கட்டண விவரங்களை வெளிப்படையாக அறிவிக்க வேண்டிய பொறுப்பு இருப்பதாகவும் அரசுத் தரப்பு தெரிவித்தது.
இந்த வழக்கு நீதிபதி எம். தண்டபாணி முன்பு விசாரணைக்கு வந்தபோது இரு தரப்பினரின் விரிவான வாதங்களும் பதிவு செய்யப்பட்டன. தமிழக அரசு சார்பில் கூடுதல் அட்வகேட் ஜெனரல் கவுதம் ஆஜராகி வாதிட்டார். மனுதாரர் தரப்பில் வழக்கறிஞர் விஜய ஆனந்த் ஆஜராகி தனது தரப்பு வாதங்களை முன்வைத்தார்.
இரு தரப்பினரின் வாதங்களையும் கவனமாக கேட்ட நீதிபதி, வழக்கின் தீர்ப்பை தேதி குறிப்பிடாமல் ஒத்திவைத்தார். இந்த தீர்ப்பு தனியார் பள்ளிகளின் கட்டண வெளிப்படைத்தன்மை மற்றும் பெற்றோர் உரிமைகள் தொடர்பான முக்கிய வழக்காக கருதப்படுவதால், கல்வித்துறை வட்டாரங்களில் பெரும் எதிர்பார்ப்பை ஏற்படுத்தியுள்ளது.
