அயோத்தி ராமர் கோயிலில் நடைபெற்ற காணிக்கை முறைகேடு விவகாரம் நாடு முழுவதும் பெரும் அதிர்வலைகளை ஏற்படுத்தி வரும் சூழலில், உத்தரகாண்ட் மாநிலத்தில் உள்ள பிரசித்தி பெற்ற பத்ரிநாத் கோயிலிலும் காணிக்கை திருட்டு நடைபெற்றதாகச் சமூக வலைதளங்களில் குற்றச்சாட்டுகள் எழுந்துள்ளன. இதனைத் தொடர்ந்து, பத்ரிநாத்–கேதார்நாத் கோயில்களின் நிர்வாகக் குழு இந்த விவகாரம் குறித்து விசாரணை நடத்த அதிரடியாக உத்தரவிட்டுள்ளது.
விசாரணை செயல்முறை இது குறித்துப் பேசிய கோயில்களின் தலைமை நிர்வாக அதிகாரி சோஹன் சிங் ரங்கட், “இந்தக் குற்றச்சாட்டுகள் குறித்து முழுமையான விசாரணை நடத்தப்படும். கோயிலில் பொருத்தப்பட்டுள்ள சிசிடிவி காட்சிகள், காணிக்கை எண்ணும் பணியில் ஈடுபட்டவர்களின் வாக்குமூலங்கள் மற்றும் பிற ஆதாரங்கள் அனைத்தும் சேகரிக்கப்பட்டு விசாரணை குழுவிடம் சமர்ப்பிக்கப்படும். விசாரணையில் குற்றச்சாட்டுகள் உண்மையானவை என்று உறுதியானால், சம்பந்தப்பட்டவர்கள் மீது சட்டப்படி கடும் நடவடிக்கை எடுக்கப்படும்” என்று உறுதி அளித்தார். மேலும், விசாரணை முடியும் வரை உறுதிப்படுத்தப்படாத தகவல்களைப் பொதுமக்கள் சமூக வலைதளங்களில் பகிர வேண்டாம் என்றும் அவர் கேட்டுக்கொண்டுள்ளார்.
அயோத்தி சம்பவத்தின் பின்னணி அயோத்தி ராமர் கோயிலில் உண்டியல் பணத்தை எண்ணும்போது திருடியதாக, பொறுப்பாளர் உட்பட 8 பேர் கைது செய்யப்பட்டனர். விசாரணையில், கோடிக்கணக்கான ரூபாய் திருடப்பட்டதை கைதான அவினாஷ் சுக்லா ஒப்புக்கொண்டார். மேலும், கோயில் அறக்கட்டளையின் பொருளாளர் அனில் மிஸ்ரா மற்றும் செயலாளர் சம்பத் ராய் ஆகியோர் மீது எழுந்த புகாரைத் தொடர்ந்து அவர்கள் தங்கள் பதவிகளை ராஜினாமா செய்தனர். இந்த விவகாரம் தொடர்பாக உத்தரப்பிரதேச அரசு ஒரு சிறப்பு புலனாய்வுக் குழுவையும் (SIT) அமைத்துள்ளது.
அயோத்தி ராமர் கோயிலைத் தொடர்ந்து, நாட்டின் மற்றொரு முக்கிய புனிதத்தலமான பத்ரிநாத் கோயிலிலும் இத்தகைய புகார் எழுந்திருப்பது ஆன்மீக மற்றும் அரசியல் வட்டாரங்களில் பெரும் அதிர்ச்சியை ஏற்படுத்தியுள்ளது.
