தமிழக சட்டப்பேரவை கூட்டத்தொடரில் நிதிநிலை அறிக்கை மீதான விவாதங்கள் மிகவும் விறுவிறுப்பாக நடைபெற்று வருகின்றன. நேற்று நடைபெற்ற விவாதத்தின்போது, திமுக உறுப்பினர் எம்.ஆர்.கே. பன்னீர்செல்வம் பேசுகையில், “நாங்கள் அமைச்சர்களாக இருந்தபோது, மக்கள் பிரச்சினைகள் தொடர்பாகக் கலைஞர் அல்லது மு.க.ஸ்டாலின் உடனுக்குடன் தொடர்புகொண்டு பேசுவார்கள். அதனால் நாங்கள் ஐந்து ஆண்டுகளும் பெரும் பதற்றத்துடனேயே (டென்ஷன்) இருந்தோம். ஆனால், தற்போது பொறுப்பேற்றுள்ள அமைச்சர்கள் மிகவும் ரிலாக்சாக இருக்கிறீர்கள்” என்று விமர்சித்திருந்தார். இதற்கு பதிலளித்த நீர்வளத்துறை அமைச்சர் என். ஆனந்த், “சிறிய பிரச்சினையாக இருந்தாலும் கூட, எங்களை உடனே தொடர்புகொண்டு சரி செய்துவிட்டீர்களா என்று கேட்கும் முதல்-அமைச்சர்தான் எங்கள் முதல்-அமைச்சர். எனவே, நாங்கள் தினந்தோறும் பயத்துடனும், டென்ஷனுடனும் தான் பணியாற்றி வருகிறோம்” என்று தெரிவித்திருந்தார்.
இந்நிலையில், இன்று நடைபெற்ற விவாதத்தின்போது, தவெக எம்.எல்.ஏ. சுகுமார், எம்.ஆர்.கே. பன்னீர்செல்வத்தின் கருத்தை விமர்சித்து, “எங்கள் மடியில் கனமில்லை, வழியில் பயமில்லை. நாங்கள் கூலாகவே இருக்கிறோம். ஐந்து ஆண்டுகளுக்குப் பிறகு தேர்தலின்போது மக்களைச் சந்திக்கும் போதும் நாங்கள் கூலாகவே இருப்போம்” என்று கூறினார். இந்த விவாதத்தின் தொடர்ச்சியாக, எதிர்க்கட்சித் தலைவர் உதயநிதி ஸ்டாலின் குறுக்கிட்டுப் பேசினார். அவர், “நேற்று அமைச்சர் என். ஆனந்த், தாங்கள் ஒவ்வொரு நிமிடமும் டென்ஷனாகவே இருக்கிறோம் என்று கூறியதை மீண்டும் உறுதிப்படுத்த வேண்டும். ஏனெனில், உங்களுக்கும் சிபிஐ மற்றும் வருமான வரி வழக்குகள் உள்ளன” என்று ஒரு அதிரடியான கேள்வியை முன்வைத்தார்.
இந்தக் கேள்வி அரசியல் அரங்கில் பெரும் சலசலப்பை ஏற்படுத்திய நிலையில், அதற்கு அமைச்சர் என். ஆனந்த் உடனடியாகப் பதிலளித்தார். அமைச்சர் தனது விளக்கத்தில், “சிபிஐ மற்றும் வருமான வரி வழக்குகள் இருப்பது உண்மைதான். ஆனால், நான் நேற்று குறிப்பிட்ட டென்ஷன் என்பது அந்த வழக்குகள் சார்ந்தது அல்ல. எங்களது முதல்-அமைச்சர், மக்கள் பிரச்சினைகளைத் தொகுதியில் உடனுக்குடன் சரி செய்யப்படுகிறதா என்று தொடர்ந்து கேட்டுக்கொண்டே இருப்பார். அந்தப் பணியின் காரணமாகவும், முதல்-அமைச்சர் எப்போது போன் செய்வாரோ என்ற பதற்றத்திலும்தான் நாங்கள் டென்ஷனாக இருக்கிறோம் என்று குறிப்பிட்டேனே தவிர, வேறு எந்த அர்த்தத்திலும் நான் பேசவில்லை” என்று தெளிவுபடுத்தினார்.
தொடர்ந்து பேசிய அவர், “எங்களை எந்த வழக்கும் பயமுறுத்தவில்லை. தொகுதியில் ஒரு சிறிய பிரச்சினை எழுந்தால் கூட, ஏன் சரி செய்யவில்லை என்று முதல்-அமைச்சர் கேள்வி கேட்பார் என்ற பயத்தில்தான் நாங்கள் ஒவ்வொரு நொடியும் விழிப்புடன் பணியாற்றுகிறோம். அந்தப் பணியின் முக்கியத்துவத்தையும், முதல்-அமைச்சரின் கவனத்தையும் குறிப்பிடுவதற்காகவே நான் அந்தப் பதிலை அளித்தேன்” என்று விளக்கம் அளித்தார். உதயநிதி ஸ்டாலினின் கேள்விக்கு அமைச்சர் அளித்த இந்தத் தெளிவான பதில், சட்டப்பேரவையில் நிலவிய பரபரப்பைத் தணித்தது. இரு தரப்பு விவாதங்களும் ஜனநாயக ரீதியிலான விமர்சனங்களாகவே அமைந்தன.
