விஜய் நடித்த ‘ஜனநாயகன்’ – 2வது பாடல் வெளியீட்டு தேதி அறிவிப்பு; படத்திற்கான எதிர்பார்ப்பு உச்சத்தில்
சென்னை,
தமிழ் சினிமாவின் முன்னணி நடிகரான விஜய் நடித்துள்ள ‘ஜனநாயகன்’ திரைப்படம் அடுத்த ஆண்டு ஜனவரி 9ஆம் தேதி திரையரங்குகளில் வெளியாக உள்ளது. எச். வினோத் இயக்கத்தில் உருவாகியுள்ள இந்த படம், 2026 பொங்கல் பண்டிகை வெளியீடாக ரசிகர்களிடம் சேரவுள்ளது. விஜயுடன் பூஜா ஹெக்டே, மமிதா பைஜு, பிரியாமணி, பாபி தியோல், கவுதம் மேனன், நரேன் உள்ளிட்ட பலர் முக்கிய கதாபாத்திரங்களில் நடித்துள்ளனர். அனிருத் ரவிச்சந்தர் இசையமைத்துள்ளதால், படத்தின் பாடல்களுக்கும் பின்னணி இசைக்கும் ரசிகர்கள் மத்தியில் தனி எதிர்பார்ப்பு நிலவுகிறது.
அரசியலில் களமிறங்கிய விஜய் நடிக்கும் கடைசி படம் என்ற காரணத்தால் ‘ஜனநாயகன்’ மீது ரசிகர்களும் தொழில்துறையும் மிகுந்த கவனம் செலுத்தி வருகின்றன. சமீபத்தில் வெளியான முதல் பாடல் “தளபதி கச்சேரி” ரசிகர்களிடையே பெரும் வரவேற்பைப் பெற்றது. பாடல் வெளியான சில மணி நேரங்களிலேயே கோடிக்கணக்கான பார்வைகளைப் பெற்றது. இப்படம் வெளியாவதற்கு முன்பே சுமார் ₹300 கோடிக்கும் மேல் வணிகம் செய்துவிட்டதாக தகவல்கள் வெளியாகியுள்ளன.
படத்தின் இசை வெளியீட்டு விழா மலேசியாவின் கோலாலம்பூரில் வரும் டிசம்பர் 27ஆம் தேதி நடைபெறவுள்ளது. இது சர்வதேச அளவில் நடைபெறும் மிகப்பெரிய இசை வெளியீட்டு விழாக்களில் ஒன்றாக இருக்கும் என படக்குழு தெரிவித்துள்ளது. மேலும், ‘ஜனநாயகன்’ படத்தின் டிரெய்லர் 2026 ஜனவரி 1ஆம் தேதி புத்தாண்டு சிறப்பு வெளியீடாக வெளியாகும் என்றும் தகவல் கிடைத்துள்ளது.
இந்த நிலையில், ரசிகர்கள் ஆவலுடன் காத்திருந்த ‘ஜனநாயகன்’ படத்தின் இரண்டாவது பாடல் வரும் டிசம்பர் 18ஆம் தேதி வெளியிடப்படும் என படக்குழு அதிகாரப்பூர்வமாக அறிவித்துள்ளது. முதல் பாடல் பெற்ற வரவேற்பை கருத்தில் கொண்டால், இரண்டாவது பாடலும் சமூக வலைதளங்களில் பெரும் பரபரப்பை ஏற்படுத்தும் என எதிர்பார்க்கப்படுகிறது.
விஜய்–அனிருத் கூட்டணி, வினோத் இயக்கம், அரசியல் பின்னணி, சர்வதேச இசை வெளியீட்டு விழா, முன்பதிவு சாதனைகள் என பல காரணங்களால் ‘ஜனநாயகன்’ தற்போது தமிழ் சினிமாவின் மிக அதிகம் பேசப்படும் படமாக மாறியுள்ளது. படத்தின் ஒவ்வொரு அப்டேட்டும் ரசிகர்களிடையே பெரும் ஆர்வத்தை உருவாக்கி வருகிறது.
