வங்காளதேச முன்னாள் பிரதமர் கலிதா ஜியா காலமானார் – அரசியல் உலகம் இரங்கல்
டாக்கா:
அண்டை நாடான வங்காளதேசத்தின் முன்னாள் பிரதமரும், வங்கதேச தேசியவாத கட்சியின் தலைவருமான கலிதா ஜியா இன்று காலமானார். அவருக்கு வயது 80. இதயம் மற்றும் நுரையீரல் தொற்று நோயால் பாதிக்கப்பட்டிருந்த கலிதா ஜியா, கடந்த மாதம் 13-ஆம் தேதி டாக்காவில் உள்ள ஒரு தனியார் மருத்துவமனையில் அனுமதிக்கப்பட்டார்.
அதனைத் தொடர்ந்து, அனுபவம் வாய்ந்த சிறப்பு மருத்துவர்கள் குழு அவருக்கு தீவிர சிகிச்சை அளித்து வந்தது. இருப்பினும், கடந்த சில நாட்களாக அவரது உடல்நிலை தொடர்ந்து மோசமடைந்து வருவதாகவும், மிகவும் கவலைக்கிடமான நிலையில் இருப்பதாகவும் மருத்துவர்கள் தெரிவித்திருந்தனர். அவரது உடல்நிலையை மருத்துவ குழு தொடர்ந்து கண்காணித்து வந்த நிலையில், சிகிச்சை பலனின்றி இன்று அவர் உயிரிழந்தார்.
கலிதா ஜியாவின் மறைவை வங்கதேச தேசியவாத கட்சி அதிகாரப்பூர்வ அறிக்கை மூலம் உறுதிப்படுத்தியுள்ளது. அவரது மரணச் செய்தி வெளியானதும், கட்சித் தொண்டர்கள் மற்றும் ஆதரவாளர்கள் மத்தியில் ஆழ்ந்த சோகத்தை ஏற்படுத்தியுள்ளது. டாக்கா உள்ளிட்ட பல பகுதிகளில் கட்சியினர் துக்கம் அனுசரித்து வருகின்றனர்.
வங்காளதேச அரசியலில் முக்கியமான தலைவராக திகழ்ந்த கலிதா ஜியா, நாட்டின் அரசியல் வரலாற்றில் தனித்துவமான இடத்தைப் பெற்றவர். அவர் கடந்த 1991 முதல் 1996 வரையும், 2001 முதல் 2006 வரையும் என இரண்டு முறை வங்காளதேச பிரதமராக பதவி வகித்துள்ளார். அவரது ஆட்சிக் காலத்தில் பல அரசியல் மாற்றங்களும், பொருளாதார சீர்திருத்தங்களும் முன்னெடுக்கப்பட்டதாக அரசியல் ஆய்வாளர்கள் குறிப்பிடுகின்றனர்.
அவரது மறைவுக்கு வங்காளதேசத்தின் பல்வேறு அரசியல் கட்சித் தலைவர்கள், சமூக அமைப்புகள் மற்றும் முக்கிய பிரமுகர்கள் இரங்கல் தெரிவித்து வருகின்றனர். “வங்காளதேசம் ஒரு முக்கிய அரசியல் தலைவரை இழந்துள்ளது” என இரங்கல் செய்திகள் வெளியாகி வருகின்றன.
அடுத்த ஆண்டு வங்காளதேசத்தில் பாராளுமன்றத் தேர்தல் நடைபெற உள்ள நிலையில், கலிதா ஜியாவின் மறைவு வங்கதேச தேசியவாத கட்சிக்கு அரசியல் ரீதியாக ஒரு பெரும் பின்னடைவாக கருதப்படுகிறது. கட்சியின் எதிர்கால தலைமையும், தேர்தல் வியூஹமும் தொடர்பாக பல்வேறு கேள்விகள் எழுந்துள்ளன.
மொத்தத்தில், கலிதா ஜியாவின் மறைவு வங்காளதேச அரசியலில் ஒரு முக்கிய அத்தியாயத்திற்கு முற்றுப்புள்ளி வைத்துள்ளதாக அரசியல் வட்டாரங்கள் தெரிவிக்கின்றன.
