தமிழ்நாடு மின்சார வாரியத்தில் 25 ஆண்டுகளுக்கும் மேலாகப் பணியாற்றி வரும் சுமார் 20,000-க்கும் மேற்பட்ட ஒப்பந்தப் பணியாளர்களை உடனடியாக பணி நிலைப்பு செய்ய வேண்டும் என்று பா.ம.க. தலைவர் அன்புமணி ராமதாஸ் வலியுறுத்தியுள்ளார்.
போராட்டத்தின் பின்னணி தங்கள் வாழ்வாதாரத்தைப் பாதுகாக்க பணி நிலைப்பு வழங்கக் கோரி, ஒப்பந்தப் பணியாளர்கள் கடந்த ஜூன் 22 முதல் மாநிலம் முழுவதும் தொடர் போராட்டத்தில் ஈடுபட்டு வருகின்றனர். இந்நிலையில், அடுத்த சில மாதங்களில் ஒப்பந்தத் தொழிலாளர்கள் அனைவரும் விடுவிக்கப்படுவார்கள் என்றும், அதற்குப் பதில் தமிழ்நாடு அரசு பணியாளர் தேர்வாணையம் மூலம் புதிய பணியாளர்கள் தேர்ந்தெடுக்கப்படுவார்கள் என்றும் மின்சாரத் துறை அமைச்சர் அண்மையில் அறிவித்தது தொழிலாளர்கள் மத்தியில் பெரும் கொந்தளிப்பை ஏற்படுத்தியுள்ளது.
நீதிமன்றத் தீர்ப்பும் அரசு அலட்சியமும் இது தொடர்பாக அன்புமணி ராமதாஸ் வெளியிட்டுள்ள அறிக்கையில், “மின்சார வாரியத்தில் 2 ஆண்டுகளில் 480 நாட்கள் தொடர்ந்து பணியாற்றிய ஊழியர்களைப் பணி நிலைப்பு செய்ய வேண்டும் என்று 2015-லேயே சென்னை உயர் நீதிமன்றம் ஆணையிட்டது. தொடர்ந்து பல சட்டப் போராட்டங்களுக்குப் பிறகும், தொழிலாளர்களுக்கு ஆதரவாகவே தீர்ப்புகள் வந்தன. ஆனால், 11 ஆண்டுகளாகியும் அந்தத் தீர்ப்புகளை நடைமுறைப்படுத்தாமல் அரசு அலட்சியம் காட்டுகிறது” என்று குற்றம் சாட்டியுள்ளார்.
கோரிக்கைகள் தேர்தல் வாக்குறுதிகளை நினைவூட்டிய அன்புமணி, “தமிழக அரசு தனது வாக்குறுதிப்படி 5 ஆண்டுகள் பணியாற்றிய தொழிலாளர்களைப் பணி நிலைப்பு செய்ய வேண்டும். பணி நீக்க முயற்சியைக் கைவிட்டு, மின் துறை அமைச்சர் அல்லது செயலாளர் தொழிலாளர்களின் பிரதிநிதிகளுடன் பேச்சுவார்த்தை நடத்தி, அவர்களின் கோரிக்கைகளை நிறைவேற்றி ஒரு மாதமாக நீடிக்கும் போராட்டத்தை உடனடியாக முடிவுக்குக் கொண்டு வர வேண்டும்” என்று வலியுறுத்தியுள்ளார்.
