📰 இந்தியா–ரஷியா உறவை வலுப்படுத்திய புதின் பயணம்
ரஷிய அதிபர் விளாடிமிர் புதின், கடந்த வாரம் 2 நாள் சுற்றுப்பயணமாக இந்தியாவுக்கு வந்தார். அமெரிக்க ஜனாதிபதி டிரம்ப், இந்தியா மீது 25 சதவீத பரஸ்பர வரி விதித்ததுடன், ரஷியாவிடம் இருந்து கச்சா எண்ணெய் வாங்குவதால் உக்ரைன் போருக்கு நிதி கிடைக்கிறது என குற்றம் சாட்டி, கூடுதலாக 25 சதவீத அபராத வரி விதித்தார். மொத்தம் 50 சதவீத வரி விதிக்கப்பட்டாலும், இந்தியா தனது நிலைப்பாட்டில் உறுதியாக இருந்து, கடந்த நவம்பர் மாதம் கூட 36 சதவீத கச்சா எண்ணெயை ரஷியாவிடம் இருந்து வாங்கியுள்ளது.
இந்த சூழ்நிலையில், இந்தியா–ரஷியா உச்சி மாநாட்டில் பங்கேற்க புதின் இந்தியா வந்தார். 80 ஆண்டுகளுக்கும் மேலாக இரு நாடுகளுக்கும் இடையே ஆழமான நட்பு நிலவுகிறது. இந்திய ராணுவ தளவாடங்கள், விவசாயத்துக்கான யூரியா, பொட்டாஷ் போன்ற ரசாயன உரங்கள் பெருமளவில் ரஷியாவிலிருந்து இறக்குமதி செய்யப்படுகின்றன. புதின் இந்தியா வந்தது 10-வது முறை என்றாலும், இந்த தடவை அவருக்கு அளிக்கப்பட்ட வரவேற்பு சிறப்பாக இருந்தது.
மாநாட்டில், எதிர்கால ஒத்துழைப்புக்காக 16 முக்கிய ஒப்பந்தங்கள் கையெழுத்தானது. 5 ஆண்டு பொருளாதார திட்டம் உருவாக்கப்பட்டது. வர்த்தக பற்றாக்குறையை குறைக்க ரஷியா, இந்தியாவில் இருந்து கூடுதலாக பொருட்களை இறக்குமதி செய்ய ஒப்புக்கொண்டது. இந்திய இளைஞர்களுக்கு ரஷியாவில் வேலைவாய்ப்பு கிடைக்க ஒப்பந்தம் கையெழுத்தானது. சுற்றுலா துறையில், ரஷியர்களுக்கு 30 நாட்கள் இலவச இ-விசா வழங்க இந்திய அரசு அறிவித்துள்ளது.
மேலும், இந்தியாவுக்கு தங்குதடையின்றி எரிபொருள் வழங்க ரஷியா ஒப்புதல் அளித்துள்ளது. கூடங்குளம் அணு மின்நிலையத்துக்கு அணுசக்தி எரிபொருள் சப்ளை செய்வதற்கும் வழிவகுக்கப்பட்டுள்ளது. இரு நாடுகளும் வர்த்தகத்தை தங்கள் நாட்டு கரன்சியிலேயே – இந்திய ரூபாய் மற்றும் ரஷிய ரூபிள் – நடத்த முடிவு செய்துள்ளன.
அதேபோல், இந்திய–ரஷிய நிறுவனங்கள் இணைந்து, ரஷியாவில் ஆண்டுக்கு 20 லட்சம் டன் யூரியா உற்பத்தி செய்யும் தொழிற்சாலை அமைக்க திட்டமிட்டுள்ளன. தற்போது ரூ.6.1 லட்சம் கோடி மதிப்புள்ள இருநாட்டு வர்த்தகத்தை, 2030-க்குள் ரூ.9 லட்சம் கோடி அளவுக்கு உயர்த்த நடவடிக்கை எடுக்க முடிவு செய்யப்பட்டுள்ளது.
இந்த ஒப்பந்தங்கள் அனைத்தும், இரு நாடுகளின் பொருளாதார, வர்த்தக மற்றும் நட்புறவை மேலும் வலுப்படுத்தும் வகையில் அமைந்துள்ளன.
