புடாபெஸ்ட்:
ஹங்கேரியின் புதிய பிரதமராக பொறுப்பேற்றுள்ள பீட்டர் மக்யார், நாட்டில் ஊழல் மற்றும் நிதி முறைகேடுகளுக்கு எதிராக கடுமையான நடவடிக்கைகளை மேற்கொள்ளும் வகையில் அதிரடி சட்ட திருத்தங்களை அறிவித்துள்ளார். அவரது நடவடிக்கைகள் ஹங்கேரி அரசியலில் புதிய பரபரப்பை ஏற்படுத்தியுள்ளன.
கடந்த இருபது ஆண்டுகளாக அரசு நிர்வாகத்தில் இடம்பெற்றதாக கூறப்படும் ஊழல், நிதி மோசடி மற்றும் அதிகார துஷ்பிரயோகங்களை கட்டுப்படுத்தும் நோக்கில் விரிவான சீர்திருத்தங்களை மேற்கொள்ள பீட்டர் மக்யார் முடிவு செய்துள்ளார். இதற்காக பல்வேறு சட்டங்களில் திருத்தம் கொண்டு வரப்படும் என அவர் அறிவித்துள்ளார்.
ஹங்கேரியின் முன்னாள் பிரதமர் விக்டர் ஆர்பன் தலைமையிலான ஆட்சிக் காலத்தில் நடைபெற்றதாக கூறப்படும் முறைகேடுகள் குறித்து விசாரணை நடத்துவதற்கும், அரசின் சொத்துக்களை பாதுகாப்பதற்கும் புதிய அமைப்பு ஒன்றை உருவாக்க திட்டமிடப்பட்டுள்ளது.
இதன்படி, “தேசிய சொத்து பாதுகாப்பு மற்றும் மீட்பு அலுவலகம்” என்ற பெயரில் புதிய விசாரணை அமைப்பு உருவாக்கப்பட உள்ளது. இந்த அமைப்பு அரசு நிதி, பொதுச் சொத்துகள் மற்றும் ஊழல் குற்றச்சாட்டுகள் தொடர்பான விசாரணைகளை மேற்கொள்ளும் என தெரிவிக்கப்பட்டுள்ளது.
நாட்டின் பொருளாதாரம் ஊழலால் கடுமையாக பாதிக்கப்பட்டுள்ளதாக பிரதமர் பீட்டர் மக்யார் குற்றம்சாட்டியுள்ளார். ஊழல் காரணமாக ஹங்கேரி பொருளாதாரத்தில் சுமார் 10 சதவீத பாதிப்பு ஏற்பட்டுள்ளதாகவும் அவர் தெரிவித்துள்ளார்.
இந்த சீர்திருத்த நடவடிக்கைகளின் ஒரு பகுதியாக மொத்தம் 47 சட்டங்களில் மாற்றம் செய்ய திட்டமிடப்பட்டுள்ளது. நீதித்துறையின் செயல்திறனை மேம்படுத்தும் நோக்கில் நீதிபதிகளின் ஓய்வு பெறும் வயதை 70 ஆக உயர்த்தும் திட்டமும் பரிசீலனையில் உள்ளது.
மேலும், அரசியல் அதிகாரம் நீண்டகாலம் ஒரே நபர்களிடம் குவிவதை தடுக்கும் வகையில் நாடாளுமன்ற உறுப்பினர்களின் பதவிக்காலத்திற்கு கட்டுப்பாடு விதிக்கவும் திட்டமிடப்பட்டுள்ளது. அதன்படி எம்.பி.க்கள் அதிகபட்சமாக 12 ஆண்டுகள் மட்டுமே பதவியில் இருக்க முடியும் என்ற புதிய நடைமுறை அறிமுகப்படுத்தப்படலாம் என தகவல்கள் தெரிவிக்கின்றன.
இதற்கிடையில், முன்னாள் பிரதமர் விக்டர் ஆர்பனின் நெருங்கிய ஆதரவாளராக கருதப்படும் தற்போதைய அதிபர் தமாஸ் சுல்யோக்கை பதவியில் இருந்து நீக்குவதற்கும் நடவடிக்கைகள் மேற்கொள்ளப்படலாம் என தகவல்கள் வெளியாகியுள்ளன. இந்த விவகாரம் ஹங்கேரி அரசியலில் பெரும் விவாதத்தை கிளப்பியுள்ளது.
புதிய பிரதமரின் நடவடிக்கைகளுக்கு ஆதரவாக ஒரு தரப்பினர் கருத்து தெரிவித்து வரும் நிலையில், எதிர்க்கட்சிகள் மற்றும் முன்னாள் ஆட்சியாளர்களின் ஆதரவாளர்கள் கடும் எதிர்ப்பையும் பதிவு செய்து வருகின்றனர்.
ஊழலை கட்டுப்படுத்தவும், அரசின் மீதான மக்களின் நம்பிக்கையை மீட்டெடுக்கவும் இந்த சீர்திருத்தங்கள் அவசியம் என பீட்டர் மக்யார் வலியுறுத்தியுள்ளார். வரவிருக்கும் நாடாளுமன்ற அமர்வில் இந்த சட்ட திருத்தங்கள் தொடர்பான மசோதாக்கள் தாக்கல் செய்யப்படும் என எதிர்பார்க்கப்படுகிறது.
