சமூக வலைத்தளங்களில் அதிகம் பயன்படுத்தப்படும் செயலிகளில் ஒன்றான இன்ஸ்டகிராம், இந்தியாவில் மட்டும் சுமார் 48 கோடி பயனர்களைக் கொண்டுள்ளது. ஆரம்பத்தில் புகைப்படங்களை பகிரும் தளமாக இருந்த இன்ஸ்டகிராம், பின்னர் குறுகிய வீடியோக்களை பதிவேற்றும் வசதியை அறிமுகப்படுத்தியது. குறிப்பாக, இந்தியாவில் டிக்டாக் தடை செய்யப்பட்ட பிறகு, இன்ஸ்டா ரீல்ஸ் மிகப்பெரிய வரவேற்பைப் பெற்றது. இளைஞர்கள் முதல் பெரியவர்கள் வரை பல தரப்பினரும் தினசரி ரீல்ஸ்களைப் பார்ப்பதும், தங்களது சொந்த ரீல்ஸ்களை உருவாக்கி பதிவிடுவதும் ஒரு பரவலான நடைமுறையாக மாறியுள்ளது.
இன்றைய தலைமுறையில், குறிப்பாக 2K கிட்ஸ்கள் என அழைக்கப்படும் இளம் பயனர்கள், செல்போனில் தலை குனிந்து ரீல்ஸ்களை தொடர்ந்து பார்ப்பது ஒரு பொதுவான காட்சியாகிவிட்டது. அதிக லைக்ஸ் மற்றும் பார்வைகளைப் பெற பல்வேறு விதமான ரீல்ஸ்களை உருவாக்கும் போட்டியும் அதிகரித்துள்ளது. இந்த சூழலில், இன்ஸ்டகிராம் ரீல்ஸ்களின் செல்வாக்கை மேலும் விரிவாக்கும் வகையில், மெட்டா நிறுவனம் ஒரு புதிய முயற்சியை அறிவித்துள்ளது.
மெட்டா நிறுவனத்தின் தகவலின்படி, இனி ரீல்ஸ்களை செல்போனில் மட்டுமல்லாமல் டிவிகளிலும் பார்க்கும் வசதி கொண்டு வரப்படுகிறது. இதன் மூலம், பெரிய திரையில் ரீல்ஸ் அனுபவத்தை பெற முடியும். முதல் கட்டமாக, அமெரிக்காவில் Amazon Fire TV ஸ்ட்ரீமிங் தளத்தில் இந்த வசதி சோதனை ரீதியாக அறிமுகப்படுத்தப்பட்டுள்ளதாக மெட்டா நிறுவனர் மார்க் சூகர்பெர்க் தெரிவித்துள்ளார். பயனர்கள் தங்களது டிவி ரிமோட் அல்லது இணைக்கப்பட்ட சாதனங்கள் மூலம் ரீல்ஸ்களை ஸ்க்ரோல் செய்து பார்க்கும் வசதி வழங்கப்படும்.
இந்த புதிய அம்சம், ரீல்ஸ் பார்வை அனுபவத்தை குடும்பத்தினருடன் பகிர்ந்து கொள்ளும் வகையில் மாற்றும் என தொழில்நுட்ப வட்டாரங்கள் கருதுகின்றன. இதுவரை தனிப்பட்ட மொபைல் அனுபவமாக இருந்த ரீல்ஸ், இனி லிவிங் ரூம் பொழுதுபோக்காக மாறும் வாய்ப்பு உள்ளது. மேலும், பெரிய திரையில் ரீல்ஸ் பார்க்கும் வசதி, உள்ளடக்க உருவாக்குநர்களுக்கும் கூடுதல் பார்வையாளர்களை ஈர்க்கும் வாய்ப்பை உருவாக்கும்.
மெட்டா நிறுவனம் இந்த அம்சத்தை உலகளாவிய அளவில் படிப்படியாக அறிமுகப்படுத்த திட்டமிட்டுள்ளது. இந்தியாவிலும் விரைவில் இந்த வசதி கிடைக்கும் என எதிர்பார்க்கப்படுகிறது.
