தமிழக சட்டசபை தேர்தலுக்கான வாக்கு எண்ணிக்கை இன்று காலை மாநிலம் முழுவதும் தொடங்கியுள்ள நிலையில், முதற்கட்டமாக தபால் வாக்குகள் எண்ணப்பட்டு வருகின்றன. இதனால் பல முக்கிய தொகுதிகளில் ஆரம்ப முன்னிலை நிலவரங்கள் வெளியாகி அரசியல் வட்டாரங்களில் பரபரப்பு ஏற்பட்டுள்ளது.
சென்னையின் முக்கியமான மற்றும் அரசியல் கவனத்தை ஈர்த்துள்ள கொளத்தூர் சட்டசபை தொகுதியில் முதலமைச்சர் மு.க. ஸ்டாலின் தபால் வாக்குகளில் முன்னிலை பெற்றுள்ளார். ஆரம்ப கட்டமாக எண்ணப்பட்ட தபால் வாக்குகளில் அவர் முன்னிலையில் உள்ளதாக தகவல் வெளியாகியுள்ளது. இதனால் திமுக ஆதரவாளர்கள் உற்சாகமடைந்துள்ளனர்.
கொளத்தூர் தொகுதி கடந்த சில தேர்தல்களாக திமுகவின் கோட்டையாக கருதப்படுகிறது. இந்த தொகுதியில் மு.க. ஸ்டாலின் போட்டியிடுவதால் மாநிலம் முழுவதும் கவனம் செலுத்தப்பட்டுள்ளது. தபால் வாக்குகளில் கிடைத்த ஆரம்ப முன்னிலை, அடுத்த கட்ட வாக்கு எண்ணிக்கைக்கும் முக்கிய அறிகுறியாக பார்க்கப்படுகிறது.
தமிழகத்தில் இந்த தேர்தலில் திமுக கூட்டணி, அதிமுக கூட்டணி, பாஜக கூட்டணி, நடிகர் விஜய்யின் தமிழக வெற்றிக் கழகம் மற்றும் நாம் தமிழர் கட்சி உள்ளிட்ட பல தரப்புகள் களமிறங்கியுள்ளன. அதனால் பல தொகுதிகளில் கடும் போட்டி நிலவுகிறது.
தபால் வாக்குகள் முடிந்த பின் மின்னணு வாக்குப்பதிவு இயந்திரங்களில் பதிவான வாக்குகள் சுற்று வாரியாக எண்ணப்பட உள்ளன. காலை 11 மணி முதல் முக்கிய முன்னிலை நிலவரங்கள் தெளிவாக தெரியவரும் என தேர்தல் அதிகாரிகள் தெரிவித்துள்ளனர்.
