தமிழகத்தில் வெங்காயத்தின் சந்தை விலை அதிகரித்துள்ள நிலையில், பொதுமக்களுக்கு நிவாரணம் அளிக்கும் வகையில் ரேஷன் கடைகளில் ஒரு கிலோ வெங்காயத்தை ₹35-க்கு விற்பனை செய்யும் திட்டம் இன்று தொடங்கப்பட்டுள்ளது.
சென்னை ஆழ்வார்பேட்டையில் உள்ள திருவல்லிக்கேணி நகர கூட்டுறவு சங்கத்தின் (TUCS) நியாயவிலைக் கடையில் உணவு மற்றும் குடிமைப் பொருள் வழங்கல் துறை அமைச்சர் பி. வெங்கடரமணன், கூட்டுறவுத் துறை அமைச்சர் வ. காந்திராஜ் ஆகியோர் திட்டத்தை தொடங்கி வைத்தனர்.
முதற்கட்டமாக நகர்ப்புற ரேஷன் கடைகள் மற்றும் கூட்டுறவு விற்பனை நிலையங்கள் மூலம் இந்த குறைந்த விலை வெங்காயம் வழங்கப்படுகிறது.
திட்டத்தின் கீழ் ஒவ்வொரு குடும்ப அட்டைதாரரும் அதிகபட்சமாக 1 கிலோ வெங்காயத்தை ₹35-க்கு வாங்க முடியும். சுமார் 80 லட்சம் குடும்ப அட்டைதாரர்கள் இந்த நடவடிக்கையால் பயன்பெறுவார்கள் என அரசு தெரிவித்துள்ளது.
வெங்காய விலையை கட்டுப்படுத்துவதற்காக NAFED மற்றும் NCCF ஆகிய மத்திய கூட்டுறவு நிறுவனங்கள் மூலம் சுமார் 1,000 மெட்ரிக் டன் வெங்காயம் கொள்முதல் செய்ய அரசு நடவடிக்கை எடுத்துள்ளது.
சந்தையில் பெரிய வெங்காயம் ஒரு கிலோ சுமார் ₹55 முதல் ₹70 வரை விற்பனை செய்யப்படும் நிலையில், ரேஷன் கடைகளில் ₹35 என்ற விலை பொதுமக்களுக்கு குறிப்பிடத்தக்க நிவாரணமாக இருக்கும் என எதிர்பார்க்கப்படுகிறது.
வெங்காயத்தின் வரத்து மற்றும் விலை நிலவரத்தை தொடர்ந்து கண்காணித்து, தேவைக்கு ஏற்ப கூடுதல் அளவு வெங்காயம் கொள்முதல் செய்து விநியோகிக்கப்படும் என்றும் அரசு தெரிவித்துள்ளது.
