புதுடில்லி:
அரசின் அனைத்து நிகழ்ச்சிகளிலும் இனி ‘வந்தே மாதரம்’ பாடல் அவசியமாக இடம்பெற வேண்டும் என மத்திய உள்துறை அமைச்சகம் புதிய உத்தரவை வெளியிட்டுள்ளது.
இந்திய தேசிய கீதத்துடன் இணைந்து தேசப்பற்று உணர்வை வலுப்படுத்தும் நோக்கில் இநத உத்தரவு பிறப்பிக்கப்பட்டுள்ளது. தேசிய கீதத்திற்கும், தேசியக் கொடிக்கும் இணையான மரியாதை ‘வந்தே மாதரம்’ பாடலுக்கும் வழங்கப்பட வேண்டும் என மத்திய அரசு வலியுறுத்தியுள்ளது.
மத்திய உள்துறை அமைச்சகம் வெளியிட்டுள்ள அறிவிப்பில், இனிமேல் அரசு விழாக்கள் மற்றும் நிகழ்ச்சிகளில் தேசிய கீதம் இசைக்கப்படுவதற்கு முன்னதாக ‘வந்தே மாதரம்’ பாடல் கட்டாயமாக பாடப்பட வேண்டும் எனக் கூறப்பட்டுள்ளது.
மேலும், ‘வந்தே மாதரம்’ பாடல் இசைக்கப்படும் போது பங்கேற்பாளர்கள் மற்றும் பார்வையாளர்கள் அனைவரும் எழுந்து நிற்க வேண்டும் என்றும் அறிவுறுத்தப்பட்டுள்ளது. இதன் மூலம் நாட்டின் ஒற்றுமை, தேசபற்று மற்றும் பண்பாட்டு மரபுகளை வலுப்படுத்தும் நோக்கம் உள்ளதாக கூறப்பட்டுள்ளது.
அதேபோல், ஜனாதிபதி மற்றும் மாநில ஆளுநர்கள் கலந்து கொள்கின்ற அரசு விழாக்களின் தொடக்கத்திலும் முடிவிலும் ‘வந்தே மாதரம்’ பாடல் இசைக்கப்பட வேண்டும் என்று உத்தரவிடப்பட்டுள்ளது. மேலும், ஆகாஷ்வானி மற்றும் தூர்தர்ஷன் போன்ற அரசு ஊடகங்கள் மூலம் ஒளிபரப்பப்படும் ஜனாதிபதி உரையின் தொடக்கம் மற்றும் முடிவிலும் ‘வந்தே மாதரம்’ பாடல் ஒலிக்கப்பட வேண்டும் என்றும் அறிவிக்கப்பட்டுள்ளது.
அரசு சார்ந்த கல்வி நிறுவனங்கள், கலாச்சார நிகழ்ச்சிகள், அதிகாரப்பூர்வ விழாக்கள், மற்றும் பொதுக்கூட்டங்கள் அனைத்திலும் இந்த வழிகாட்டுதலை கடைப்பிடிக்க வேண்டுமென உள்துறை அமைச்சகம் தெரிவித்துள்ளது.
இந்த உத்தரவு, ‘வந்தே மாதரம்’ பாடல் 150ஆம் ஆண்டு நிறைவு விழா கொண்டாடப்படும் முக்கியமான ஆண்டில் வெளியிடப்பட்டிருப்பது குறிப்பிடத்தக்கது. பங்கிம் சந்திர சட்டோபாத்யாயா எழுதிய இந்தப் பாடல், இந்திய சுதந்திரப் போராட்டத்தின் காலத்திலிருந்து தேசப்பற்று உணர்வின் அடையாளமாகக் கருதப்படுகிறது.
அரசியல் மற்றும் சமூக வட்டாரங்களில் இந்த உத்தரவு குறித்து கலந்துரையாடல்கள் உருவாகியுள்ளன. மத்திய அரசு, இது எந்த ஒரு மத, மொழி அல்லது பிராந்திய வேறுபாடுகளையும் உட்படுத்தாத தேசமரியாதையை பிரதிபலிக்கும் தீர்மானம் என விளக்கமளித்துள்ளது.
மொத்தத்தில், ‘வந்தே மாதரம்’ பாடலை அரசு நிகழ்ச்சிகளில் கட்டாயமாகச் சேர்க்கும் இந்த உத்தரவு, தேசத்தின் ஒற்றுமையையும் தேசிய உணர்வையும் வலுப்படுத்தும் புதிய முயற்சியாக பார்க்கப்படுகிறது.
