உலகக் கோப்பை கால்பந்து வரலாற்றில் மேலும் ஒரு பொற்கால சாதனையை படைத்து ரசிகர்களை உற்சாகத்தில் ஆழ்த்தியுள்ளார் அர்ஜென்டினா நட்சத்திர வீரர் லியோனல் மெஸ்சி. ஜெர்மனியின் முன்னாள் ஜாம்பவான் மிராஸ்லாவ் குளோசே வைத்திருந்த உலகக் கோப்பை அதிக கோல்கள் சாதனையை முறியடித்து புதிய உச்சத்தை எட்டியுள்ள மெஸ்சிக்கு உலகம் முழுவதும் பாராட்டுகள் குவிந்து வருகின்றன.
2026 உலகக் கோப்பை கால்பந்து தொடரில் ஆஸ்திரியாவுக்கு எதிராக நடைபெற்ற லீக் போட்டியில் அர்ஜென்டினா அணி 2-0 என்ற கோல் கணக்கில் வெற்றி பெற்றது. இந்த போட்டியின் நாயகனாக மெஸ்சி திகழ்ந்தார். ஆட்டத்தின் முதல் பாதியிலேயே ஒரு கோல் அடித்த அவர், உலகக் கோப்பை வரலாற்றில் அதிக கோல்கள் அடித்த வீரர் என்ற பெருமையை பெற்றார்.
இதற்கு முன்பு ஜெர்மனி முன்னாள் நட்சத்திரம் மிராஸ்லாவ் குளோசே 16 கோல்கள் அடித்து சாதனை படைத்திருந்தார். பல ஆண்டுகளாக நீடித்து வந்த அந்த சாதனையை முறியடித்த மெஸ்சி, தனது 17வது உலகக் கோப்பை கோலை பதிவு செய்து புதிய வரலாற்றை உருவாக்கினார். அதன்பிறகு போட்டியின் இரண்டாம் பாதியிலும் மேலும் ஒரு கோல் அடித்து தனது மொத்த உலகக் கோப்பை கோல் எண்ணிக்கையை 18 ஆக உயர்த்தினார்.
இந்த சாதனை உலக கால்பந்து ரசிகர்கள் மத்தியில் பெரும் வரவேற்பை பெற்றுள்ளது. குறிப்பாக பல ஆண்டுகளாக மெஸ்சி மற்றும் கிறிஸ்டியானோ ரொனால்டோ இடையேயான ஒப்பீடுகள் பேசப்பட்டு வரும் நிலையில், உலகக் கோப்பை மேடையில் மெஸ்சி தொடர்ந்து புதிய சாதனைகளை படைத்து வருவது அவரது மகத்துவத்தை மீண்டும் நிரூபித்துள்ளது.
தனது சாதனையை முறியடித்த மெஸ்சிக்கு ஜெர்மனி முன்னாள் வீரர் மிராஸ்லாவ் குளோசே மனமார்ந்த வாழ்த்துகளை தெரிவித்துள்ளார். அவர் அளித்த பேட்டியில், “மெஸ்சி ஒரு சாதாரண வீரர் அல்ல. அவரை போன்ற வீரர்கள் தலைமுறைகளில் ஒருமுறை மட்டுமே பிறக்கிறார்கள். என்னைப் பொறுத்தவரை கால்பந்து வரலாற்றின் மிகச்சிறந்த வீரர் மெஸ்சி தான். என் சாதனையை அவர் முறியடித்தது மகிழ்ச்சியளிக்கிறது. வாழ்த்துகள் சாம்பியன்” என்று பாராட்டினார்.
குளோசே போன்ற உலகக் கோப்பை ஜாம்பவானின் இந்த பாராட்டு சமூக வலைதளங்களில் வைரலாகி வருகிறது. ரசிகர்கள் பலரும் “ஒரு சாதனையாளர் மற்றொரு சாதனையாளரை கௌரவிக்கும் தருணம்” என்று கருத்து தெரிவித்து வருகின்றனர்.
நடப்பு உலகக் கோப்பை தொடரில் மெஸ்சி அபாரமான பார்மில் உள்ளார். அர்ஜென்டினா இதுவரை விளையாடிய இரண்டு போட்டிகளிலும் அவர் அசத்தலான ஆட்டத்தை வெளிப்படுத்தியுள்ளார். முதல் போட்டியில் அல்ஜீரியாவுக்கு எதிராக ஹாட்ரிக் கோல் அடித்த மெஸ்சி, இரண்டாவது போட்டியில் ஆஸ்திரியாவுக்கு எதிராக இரண்டு கோல்கள் அடித்து மொத்தம் 5 கோல்களுடன் தொடரின் அதிக கோல் அடித்த வீரர்கள் பட்டியலில் முதலிடத்தில் உள்ளார்.
39 வயதை கடந்த பிறகும் உலகின் சிறந்த வீரர்களுடன் போட்டியிட்டு சாதனை படைத்து வரும் மெஸ்சி, வயது என்பது வெறும் எண் மட்டுமே என்பதை மீண்டும் நிரூபித்துள்ளார். அவரது தலைமையில் அர்ஜென்டினா அணி மீண்டும் உலகக் கோப்பையை வெல்லும் கனவில் முன்னேறி வருகிறது.
உலகக் கோப்பை வரலாற்றில் அதிக கோல்கள் அடித்த வீரர் என்ற பெருமையை பெற்றுள்ள மெஸ்சி, ஏற்கனவே உலக சாம்பியன் பட்டம், பலன் டி’ஓர் விருதுகள், கோபா அமெரிக்கா வெற்றி உள்ளிட்ட எண்ணற்ற சாதனைகளை தனது பெயரில் பதிவு செய்துள்ளார். தற்போது இந்த புதிய சாதனை அவரது மகத்தான கால்பந்து பயணத்தில் மேலும் ஒரு மைல்கல்லாக அமைந்துள்ளது.
உலக கால்பந்தின் உயிரோட்டமாக திகழும் லியோனல் மெஸ்சி, இன்னும் எத்தனை சாதனைகளை படைக்கப் போகிறார் என்ற எதிர்பார்ப்பில் ரசிகர்கள் காத்திருக்கின்றனர்.
