சென்னை மாநகராட்சி தூய்மைப் பணியாளர்கள் பல்வேறு கோரிக்கைகளை வலியுறுத்தி கடந்த 15 நாட்களாக தொடர் போராட்டத்தில் ஈடுபட்டு வரும் நிலையில், அவர்களுடன் தமிழக அமைச்சர்கள் குழு இன்று பேச்சுவார்த்தை நடத்த உள்ளது.
சென்னை ரிப்பன் மாளிகையில் இன்று காலை 11.30 மணிக்கு இந்த பேச்சுவார்த்தை நடைபெறுகிறது. அமைச்சர்கள் என். ஆனந்த், ஆதவ் அர்ஜுனா, நிர்மல்குமார் மற்றும் ராஜ்மோகன் ஆகியோர் அடங்கிய குழு தூய்மைப் பணியாளர்களின் பிரதிநிதிகளுடன் ஆலோசனை நடத்த திட்டமிட்டுள்ளது.
தூய்மைப் பணியாளர்கள் பணி நிரந்தரம், நியாயமான ஊதிய உயர்வு, தனியார்மயமாக்கலை கைவிடுதல், மகப்பேறு விடுப்பு, மாதவிடாய் விடுப்பு, வாராந்திர விடுமுறை மற்றும் சிறந்த பணிச்சூழல் உள்ளிட்ட 9 அம்ச கோரிக்கைகளை முன்வைத்து போராடி வருகின்றனர்.
முன்னதாக சட்டப்பேரவையில் இந்த விவகாரம் எழுப்பப்பட்டபோது, தூய்மைப் பணியாளர்களின் பிரச்சினைகளுக்கான அரசு ஆவணங்கள் தயாராகி வருவதாகவும், விரைவில் நல்ல தீர்வு கிடைக்கும் என்றும் அமைச்சர் ராஜ்மோகன் தெரிவித்திருந்தார்.
இந்நிலையில் இன்று நடைபெறும் அமைச்சர்கள் குழு–தூய்மைப் பணியாளர்கள் பேச்சுவார்த்தை முக்கியத்துவம் பெற்றுள்ளது. பணி நிரந்தரம் மற்றும் ஊதிய உயர்வு உள்ளிட்ட முக்கிய கோரிக்கைகளில் அரசு என்ன முடிவு எடுக்கிறது என்பது எதிர்பார்ப்பை ஏற்படுத்தியுள்ளது.
