சிவகார்த்திகேயன் நடிப்பில் ‘பராசக்தி’ – ஜனவரி 10 வெளியீடு உறுதி
சென்னை: சிவகார்த்திகேயன் நடிப்பில், சுதா கொங்கரா இயக்கத்தில் உருவாகியுள்ள ‘பராசக்தி’ திரைப்படம் வரும் ஜனவரி 10ஆம் தேதி திரையரங்குகளில் வெளியாகிறது. இது நடிகர் சிவகார்த்திகேயனின் 25வது படமாகும். ஆகாஷ் பாஸ்கரனின் டான் பிக்சர்ஸ் தயாரித்துள்ள இந்த படத்தில் அதர்வா, ரவி மோகன், பசில் ஜோசப் உள்ளிட்டோர் முக்கிய கதாபாத்திரங்களில் நடித்துள்ளனர். நாயகியாக ஸ்ரீலீலா அறிமுகமாகியுள்ளார்.
1960களின் வரலாற்றுப் பின்னணியில் உருவாகியுள்ள இந்த படம், அந்தக் காலத்தின் சமூக, அரசியல் சூழலை பிரதிபலிக்கும் வகையில் அமைந்துள்ளது. இப்படத்திற்கு ஜிவி பிரகாஷ் இசையமைத்துள்ளார். பாடல்கள் மற்றும் பின்னணி இசை ரசிகர்களிடையே ஏற்கனவே எதிர்பார்ப்பை ஏற்படுத்தியுள்ளது.
படக்குழுவினர், சென்னை வள்ளுவர் கோட்டத்தில் 60களின் காலகட்டத்தை மீண்டும் உயிர்ப்பிக்க சிறப்பு செட் அமைத்துள்ளனர். பழைய கார்கள், ரயில், ரயில் நிலையம், அத்தியாவசிய பொருட்கள் உள்ளிட்டவை பயன்படுத்தப்பட்டு, ‘பராசக்தி’ பட உலகம் கண்காட்சியாக உருவாக்கப்பட்டுள்ளது. பொதுமக்கள் பார்வையிடும் வகையில் ஏற்பாடு செய்யப்பட்ட இந்த கண்காட்சி வரும் டிசம்பர் 25ஆம் தேதி வரை நடைபெற உள்ளது. சமீபத்தில் நடிகர் சிவகார்த்திகேயனின் குடும்பத்தினர் இந்தக் கண்காட்சியை பார்வையிட்டனர்.
முதலில், ‘பராசக்தி’ படம் பொங்கல் விடுமுறையையொட்டி ஜனவரி 14ஆம் தேதி வெளியாக திட்டமிடப்பட்டிருந்தது. ஆனால், ‘ஜனநாயகன்’ படத்துடன் நேரடி போட்டியை தவிர்க்கும் வகையில், படக்குழு வெளியீட்டு தேதியை மாற்றியுள்ளது. இதனால், ‘பராசக்தி’ படம் ஜனவரி 10ஆம் தேதி திரையரங்குகளில் வெளியாகிறது.
திரைப்பட ரசிகர்கள், சிவகார்த்திகேயனின் 25வது படமாகும் ‘பராசக்தி’ வெளியீட்டை ஆவலுடன் எதிர்பார்த்து வருகின்றனர். வரலாற்றுப் பின்னணியில் உருவாகியுள்ள இந்த படம், பொங்கல் பண்டிகை காலத்தை முன்னிட்டு ரசிகர்களுக்கு ஒரு சிறப்பு பரிசாக அமையும் என எதிர்பார்க்கப்படுகிறது.
