திருவள்ளூர் மாவட்டம் திருத்தணி முருகன் கோவிலில் தேமுதிக பொதுச்செயலாளர் பிரேமலதா விஜயகாந்த் சாமி தரிசனம் செய்தார். அங்கு நடைபெற்ற சிறப்பு வழிபாடுகளில் பங்கேற்ற அவர், முருகப்பெருமானுக்கு 6 அடி உயரம் கொண்ட பிரம்மாண்டமான வெள்ளி வேலைக் காணிக்கையாகச் செலுத்தினார். மேலும், தங்கத் தேர் இழுத்து தனது வேண்டுதலை அவர் நிறைவேற்றினார். இதனையடுத்து செய்தியாளர்களைச் சந்தித்துப் பேசிய அவர், தமிழக அரசியல் மற்றும் மக்கள் பிரச்சனைகள் குறித்து பல முக்கியக் கருத்துக்களைப் பகிர்ந்து கொண்டார்.
செய்தியாளர்களைச் சந்தித்துப் பேசிய பிரேமலதா விஜயகாந்த் கூறியதாவது:- தேர்தலில் வெற்றி பெற்றால் திருத்தணி கோவிலில் வெள்ளி வேல் காணிக்கை செலுத்துவதாக நான் வேண்டி இருந்தேன். அந்த வேண்டுதலை நிறைவேற்றும் விதமாகவே இன்று திருத்தணிக்கு வந்து முருகப்பெருமானை தரிசித்து வெள்ளி வேலைச் சமர்ப்பித்தேன். தொடர்ந்து தமிழகத்தில் உள்ள கோவில்களில் ஆன்மீகப் பக்தர்களுக்குத் தேவையான பாதுகாப்பு, குடிநீர் வசதி, உணவு, போக்குவரத்து உள்ளிட்ட அடிப்படை வசதிகளை அரசு உரிய முறையில் செய்து கொடுக்க வேண்டும் என வலியுறுத்தினார்.
மேலும், பழனி முருகன் கோவில் நில மோசடி வழக்கு குறித்துப் பேசிய அவர், ஆன்மீக ஸ்தலங்கள் மற்றும் கோவில் நிலங்களில் முறைகேடுகளில் ஈடுபடுபவர்கள் யாராக இருந்தாலும் சட்டப்படி கடுமையான தண்டனையைப் பெறுவார்கள் என்றும், இறைவனிடமிருந்தும், இயற்கையிடமிருந்தும் அவர்களால் தப்ப முடியாது என்றும் எச்சரித்தார். தொடர்ந்து பேசிய அவர், முதலமைச்சர் விஜய் குறித்து அவதூறாகப் பேசிய வழக்கில் திமுக எம்.எல்.ஏ.-வை இரவோடு இரவாகக் கைது செய்திருக்கத் தேவையில்லை என்றும், அவரை எச்சரித்து அனுப்பி இருக்கலாம் என்றும் குறிப்பிட்டார். இந்த நடவடிக்கை தற்போதைய அரசின் அரசியல் வன்மத்தையே காட்டுவதாகவும் அவர் விமர்சித்தார்.
தமிழகத்தில் வரவிருக்கும் புதிய அரசின் பட்ஜெட் தாக்கல் குறித்துப் பேசிய பிரேமலதா, வரவிருக்கும் பட்ஜெட் பொதுமக்களின் நீண்ட நாள் எதிர்பார்ப்புகளை முழுமையாகப் பூர்த்தி செய்யும் வகையில் அமைய வேண்டும் என்றார். நீட் தேர்வு விவகாரத்தில் மத்திய மற்றும் மாநில அரசுகள் பொதுமக்கள் மற்றும் மாணவர்களின் உணர்வுகளைப் புரிந்துகொண்டு தீர்வு காண வேண்டும் எனக் கேட்டுக்கொண்டார். மேலும், தமிழகத்தில் தற்போது அறிவிக்கப்படாத மின்வெட்டு பிரச்சனைகள் தலைதூக்கி இருப்பதாகவும், முதலமைச்சர் விஜய் உடனடியாகத் தலையிட்டு மின் கட்டண உயர்வைக் குறைக்கத் தேவையான நடவடிக்கைகளை எடுக்க வேண்டும் என்றும் வலியுறுத்தினார்.
காவிரி மேகதாது விவகாரத்தில் கர்நாடக அரசு அணை கட்டுவதற்குக் கடுமையான எதிர்ப்புத் தெரிவித்து, தேமுதிக சார்பில் வரும் ஆகஸ்ட் 1-ஆம் தேதியன்று ஒகேனக்கல்லில் மாபெரும் ஆர்ப்பாட்டம் நடைபெறும் என்றும் அவர் அறிவித்தார். குறிப்பாக, விவசாயிகளின் நலனைக் காக்க தமிழக அரசு அவர்களின் அனைத்து விதமான விவசாயக் கடன்களையும் முழுமையாகத் தள்ளுபடி செய்ய வேண்டும் எனத் கோரிக்கை விடுத்தார்.
திரைப்படங்களில் விவசாயிகளுக்காகவும், மக்களுக்காகவும் குரல் கொடுக்கும் முதலமைச்சர் விஜய், தான் சினிமாவில் பேசிய வசனங்களை நிஜ வாழ்க்கையிலும் (Real Life) செயலாற்றி நிரூபிக்க வேண்டும் என்றார். அப்படிச் செய்தால் மட்டுமே தமிழ்நாட்டு மக்கள் அவரை உண்மையான ‘ஹீரோ’வாக (Real Hero) ஏற்றுக்கொள்வார்கள் என்றும், இல்லையென்றால் அது வெறும் கண்துடைப்பாகவே போய்விடும் என்றும் பிரேமலதா விஜயகாந்த் காட்டமாகத் தெரிவித்தார். திருத்தணி கோவிலில் சாமி தரிசனம் செய்த பின்னர் அவர் வெளியிட்ட சமூக வலைதள பதிவிலும், மக்களின் நலனுக்காகவும் அமைதிக்காகவும் மனமாரப் பிரார்த்தனை செய்ததாகக் குறிப்பிட்டுள்ளார்.
