சூப்பர் ஸ்டார் ரஜினிகாந்த் கலந்து கொண்ட ‘தர்மன்’ திரைப்பட அறிமுக விழாவில் அவர் பேசிய சில வார்த்தைகள் தற்போது அரசியல் மற்றும் சமூக வலைதளங்களில் புதிய விவாதத்தை ஏற்படுத்தியுள்ளன. குறிப்பாக, அவரது பேச்சு தமிழக முதல்-அமைச்சர் ஜோசப் விஜய்க்கு ஆதரவாக இருந்ததா என்ற கேள்வி பல தரப்பினரிடையே எழுந்துள்ளது.
தமிழ் சினிமாவின் முன்னணி நடிகரான ரஜினிகாந்த் தற்போது தனது 173-வது திரைப்படத்திற்காக தயாராகி வருகிறார். இதுவரை ‘தலைவர் 173’ என அழைக்கப்பட்டு வந்த இந்த திரைப்படத்திற்கு ‘தர்மன்’ என்று அதிகாரப்பூர்வமாக பெயரிடப்பட்டுள்ளது. இந்த படத்தை இயக்குநர் அஸ்வத் மாரிமுத்து இயக்குகிறார். ‘ஓ மை கடவுளே’ மற்றும் ‘டிராகன்’ போன்ற வெற்றிப்படங்களை இயக்கிய அஸ்வத் மாரிமுத்துவுடன் ரஜினிகாந்த் முதல் முறையாக இணைந்திருப்பது ரசிகர்களிடையே பெரும் எதிர்பார்ப்பை ஏற்படுத்தியுள்ளது.
இந்த படத்தை நடிகர் கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்கிறது. இசையமைப்பாளர் அனிரூத் இசையமைக்கிறார். மேலும், இயக்குநர் ஷங்கர் முக்கிய கதாபாத்திரத்தில் நடிக்க உள்ளதாகவும், மலையாள நடிகர் பாசில் ஜோசப் முக்கிய வேடத்தில் தோன்ற உள்ளதாகவும் தகவல்கள் வெளியாகியுள்ளன.
இந்நிலையில், சென்னையில் நடைபெற்ற ‘தர்மன்’ திரைப்படத்தின் அறிமுக விழாவில் பேசிய ரஜினிகாந்த், தனது வழக்கமான பாணியில் ரசிகர்களையும், ஊடகங்களையும் சிரிக்க வைத்ததுடன் சிந்திக்கவும் வைத்தார்.
அவர் பேசுகையில், “நாம் பேசாமல் இருந்தால் வாயில் என்ன கொழுக்கட்டை வைத்திருக்கிறாய் என்று கேட்பார்கள். பேச ஆரம்பித்தால் இப்போது பேசு என்று சொல்வார்கள். பேசி முடித்த பிறகு பேசாமல் இருந்திருக்கலாம் என்று சொல்வார்கள். அதனால் உஷாராக இருக்க வேண்டும். நம்மை பிடிக்காதவர்களுக்கு நாம் என்ன செய்தாலும் பிடிக்காது. நம்மை பிடிப்பவர்கள் நாம் என்ன செய்தாலும் சரி என்று நினைப்பதும் தவறு” என்று கூறினார்.
இந்த பேச்சு நிகழ்ச்சியில் இருந்தவர்களிடையே கைதட்டல்களை பெற்றதோடு, சமூக வலைதளங்களிலும் வேகமாக பரவியது. குறிப்பாக, கடந்த சில நாட்களாக தமிழக அரசியல் சூழலில் முதல்-அமைச்சர் விஜய் தொடர்பான விவாதங்கள் அதிகரித்துள்ள நிலையில், ரஜினியின் இந்த கருத்து யாரை நோக்கி கூறப்பட்டது என்ற கேள்வி எழுந்துள்ளது.
சமீபத்தில் சட்டமன்றத்தில் கவர்னர் உரை மீதான விவாதத்திற்கு பதிலளித்து முதல்-அமைச்சர் விஜய் பேசியிருந்தார். அவர் பேசிய உரை அரசியல் வட்டாரங்களில் பல்வேறு எதிர்வினைகளை ஏற்படுத்தியது. அதற்கு முன்பு, “முதல்-அமைச்சர் அதிகம் பேசுவதில்லை” என்று எதிர்க்கட்சிகள் தொடர்ந்து விமர்சனம் செய்து வந்தன. பின்னர் அவர் பேச ஆரம்பித்தபோது, அந்த பேச்சும் புதிய விவாதங்களை உருவாக்கியது.
இந்த சூழ்நிலையில் ரஜினிகாந்த் கூறிய “பேசினாலும் விமர்சனம், பேசாவிட்டாலும் விமர்சனம்” என்ற கருத்து, மறைமுகமாக முதல்-அமைச்சர் விஜய்க்கு ஆதரவாக கூறப்பட்டதா என்ற கேள்வி சமூக வலைதளங்களில் எழுந்துள்ளது.
அதேநேரத்தில், சில அரசியல் விமர்சகர்கள் இதை பொதுவான வாழ்க்கை அனுபவமாகவே பார்க்க வேண்டும் என்றும், ரஜினிகாந்த் குறிப்பாக யாரையும் சுட்டிக்காட்டவில்லை என்றும் கருத்து தெரிவித்து வருகின்றனர். ஆனால், சமூக வலைதளங்களில் இந்த பேச்சு தொடர்பான விவாதங்கள் தொடர்ந்து நடைபெற்று வருகின்றன.
குறிப்பாக, கடந்த சட்டமன்றத் தேர்தலுக்கு முன்பு நடிகர்களை கண்மூடித்தனமாக பின்பற்றுவது ஆபத்தானது என்று ரஜினிகாந்த் கூறியிருந்தார். அப்போது அந்த கருத்து விஜயை நோக்கிய விமர்சனமாக பார்க்கப்பட்டது. தற்போது அவரது புதிய பேச்சு விஜய்க்கு ஆதரவாக இருக்கலாம் என்று சிலர் கருத்து தெரிவிப்பது அரசியல் அரங்கில் புதிய பரபரப்பை ஏற்படுத்தியுள்ளது.
ரஜினிகாந்த் அரசியல் குறித்து நேரடியாக பேசும் ஒவ்வொரு முறையும் அது பெரிய விவாதமாக மாறுவது வழக்கமாக உள்ளது. இந்த முறை ‘தர்மன்’ திரைப்பட விழாவில் அவர் கூறிய சில வார்த்தைகளே அரசியல் அர்த்தங்களுடன் பேசப்பட்டு வருகின்றன.
இதனால், ரஜினியின் பேச்சு உண்மையில் யாருக்கானது? பொதுவான கருத்தா? அல்லது அரசியல் சூழலை ஒட்டிய மறைமுக கருத்தா? என்பது குறித்து சமூக வலைதளங்களிலும் அரசியல் வட்டாரங்களிலும் தொடர்ந்து விவாதம் நடைபெற்று வருகிறது.
