நில நிர்வாக ஆணையராக மூத்த ஐ.ஏ.எஸ். அதிகாரி ராஜேஷ் லக்கானி நியமனம்: கூடுதல் தலைமைச் செயலாளர் அந்தஸ்து வழங்கி தமிழக அரசு அரசாணை வெளியீடு!
சென்னை: மத்திய அரசுப் பணியில் இருந்து மீண்டும் தமிழக அரசுப் பணிக்குத் திரும்பியுள்ள மூத்த ஐ.ஏ.எஸ். அதிகாரியான ராஜேஷ் லக்கானி, நில நிர்வாக ஆணையராக நியமிக்கப்பட்டுள்ளதாகத் தமிழக அரசு அதிகாரப்பூர்வமாக அறிவித்துள்ளது. அவர் வகிக்கும் இந்தப் பணியிடம் கூடுதல் தலைமைச் செயலாளர் மற்றும் தலைமைச் செயலாளருக்கு இணையான அந்தஸ்து கொண்டதாக இருக்கும் என்றும் அரசுத் தரப்பில் தெரிவிக்கப்பட்டுள்ளது.
இது தொடர்பாகத் தமிழக அரசின் தலைமைச் செயலாளர் எம்.சாய் குமார் வெளியிட்டுள்ள அரசாணை மற்றும் செய்திக்குறிப்பில் குறிப்பிடப்பட்டுள்ளதாவது:
ஐ.ஏ.எஸ். (பணியிட ஒதுக்கீடு) விதிகள், 1954-இன் விதி 4 (2)-இன் கீழ் வழங்கப்பட்டுள்ள அதிகாரங்களின்படி, ‘கூடுதல் தலைமைச் செயலாளர் / ஆணையர், நில நிர்வாகம்’ என்ற தற்காலிகப் பணியிடத்தை புதிதாக உருவாக்குவதற்குத் தமிழக அரசு ஒப்புதல் அளித்துள்ளது. இந்த சிறப்புப் பணியிடமானது, அதிகாரி பணியில் சேரும் நாளிலிருந்து ஓராண்டு காலத்திற்கோ அல்லது இந்த தற்காலிகப் பணியிடத்தின் தேவை முடிவுக்கு வரும் வரையோ – இதில் எது முந்தையதோ, அதுவரை செயல்பாட்டில் இருக்கும் வகையில் உருவாக்கப்பட்டுள்ளது.
மத்திய அரசின் பணியிலிருந்து (Deputation) தாய் மாநிலப் பணிக்குத் திரும்பியுள்ள 1992-ஆம் ஆண்டு பேட்ச் ஐ.ஏ.எஸ். அதிகாரியான ராஜேஷ் லக்கானி, புதிதாக உருவாக்கப்பட்ட ‘கூடுதல் தலைமைச் செயலாளர் / ஆணையர், நில நிர்வாகம்’ என்ற பணியிடத்தில் உடனடியாக நியமிக்கப்படுகிறார். நில நிர்வாக ஆணையராக ஏற்கனவே பணியாற்றி, வேறு துறைக்கு மாற்றம் செய்யப்பட்ட ஆர்.கஜலட்சுமி, ஐ.ஏ.எஸ்.-க்கு பதிலாக ராஜேஷ் லக்கானி பொறுப்பேற்பார்.
மேலும், ஐ.ஏ.எஸ். (ஊதியம்) விதிகள், 2016-இன் விதி 12 (1)-இன் கீழ், புதிதாக உருவாக்கப்பட்டுள்ள ‘கூடுதல் தலைமைச் செயலாளர் / ஆணையர், நில நிர்வாகம்’ என்ற பணியிடமானது, அட்டவணை II-A-இல் குறிப்பிடப்பட்டுள்ள ‘தலைமைச் செயலாளர்’ (Chief Secretary) என்ற உயர் பணியிடத்திற்கு இணையான தகுதிகள், அதிகாரங்கள், பொறுப்புகள் மற்றும் ஊதிய அந்தஸ்தைக் கொண்டதாக இருக்கும் என்று ஆளுநரின் ஆணையின்படி அரசு முறைப்படி அறிவிக்கிறது.
பின்னணி விவரம்: 1992-ஆம் ஆண்டு பிரிவைச் சேர்ந்த திறமையான ஐ.ஏ.எஸ். அதிகாரியான ராஜேஷ் லக்கானி, தமிழக அரசின் பல்வேறு முக்கியத் துறைகளில் உயரிய பொறுப்புகளை வகித்த அனுபவம் கொண்டவர். கடந்த பிப்ரவரி மாதம், தமிழக அரசுப் பணியிலிருந்து மத்திய அரசுப் பணிக்கு மாற்றப்பட்ட இவர், டெல்லியில் மத்திய அரசின் பள்ளிக் கல்வித் துறையின் கீழ் இயங்கும் ‘நவோதயா வித்யாலயா சமிதி’யின் ஆணையராகச் சிறப்பான முறையில் பணியாற்றி வந்தார்.
இந்நிலையில், மத்திய பணியாளர் நலத்துறை இவரை மீண்டும் தமிழக அரசுப் பணிக்குத் திரும்ப அனுமதித்தது. அதைத் தொடர்ந்து, நில நிர்வாகத் துறையில் நிலுவையில் உள்ள முக்கிய திட்டங்களை விரைவுபடுத்தவும், நிர்வாகச் சீர்திருத்தங்களை மேற்கொள்ளவும் அவருக்குத் தலைமைச் செயலாளர் அந்தஸ்திலான உயரிய பொறுப்பைத் தமிழக அரசு வழங்கியுள்ளது குறிப்பிடத்தக்கது.
