உலகின் மிக முக்கியமான கப்பல் போக்குவரத்து பாதையான ஹார்மூஸ் ஜலசந்தியில், சரக்குக் கப்பல் ஒன்று ஏவுகணை தாக்குதலுக்கு உள்ளாகியுள்ளது. ஓமன் நாட்டின் கும்ஜார் நகருக்கு வடமேற்கே சுமார் 15 கி.மீ தொலைவில் இச்சம்பவம் நிகழ்ந்துள்ளது.
சம்பவம் என்ன? தாக்குதலுக்குள்ளான கப்பல் தீப்பிடித்து எரிந்த நிலையில், அதில் இருந்த ஊழியர்கள் அனைவரும் உடனடியாகக் கப்பலை விட்டு வெளியேறி, மீட்புப் படகுகளின் உதவியுடன் பத்திரமாக மீட்கப்பட்டனர். தற்போது கப்பலில் ஊழியர்கள் யாரும் இல்லை, தீயும் இன்னும் முழுமையாக அணைக்கப்படவில்லை. கப்பல் ஆட்கள் இன்றி கடலில் மிதந்து கொண்டிருக்கிறது.
எச்சரிக்கை மற்றும் விசாரணை இங்கிலாந்து கடல்சார் வர்த்தக செயல்பாடுகளுக்கான அமைப்பு (UKMTO) இந்தத் தாக்குதலை உறுதிப்படுத்தியுள்ளது. அதிகாரிகள் சம்பவ இடத்திற்கு விரைந்து விசாரணை நடத்தி வருகின்றனர். இப்பகுதி வழியாகச் செல்லும் பிற கப்பல்கள் அனைத்தும் மிகுந்த எச்சரிக்கையுடன் செல்லுமாறும், ஏதேனும் சந்தேகத்திற்குரிய செயல்பாடுகள் தென்பட்டால் உடனடியாகத் தெரிவிக்குமாறும் அறிவுறுத்தப்பட்டுள்ளது. அமெரிக்கா-ஈரான் இடையேயான மோதல் சூழலில் இத்தாக்குதல் நடைபெற்றுள்ளதால், இப்பகுதியில் பதற்றம் மேலும் அதிகரித்துள்ளது.
