திருப்பூர்: தாராபுரம் தொகுதியில் தமிழக வெற்றிக் கழகத்திற்கு ஆதரவாக தேர்தல் பணிகளை தீவிரப்படுத்தி வரும் அக்கட்சியின் வேட்பாளர் சத்யபாமா, வீடு வீடாக கட்சித் தலைவர் விஜய்யின் புகைப்படத்தை ஒட்டுவது தொடர்பாக நிர்வாகிகளுக்கு முக்கிய அறிவுறுத்தல் வழங்கியுள்ளார். குறிப்பிட்ட ஒரு வீட்டில் விஜய்யின் புகைப்படத்தை ஒட்ட வேண்டாம் என்று கூறினால், அந்த வீட்டில் தவெகவிற்கு வாக்கு கிடைக்காது என்பதை அறிந்து கொள்ளலாம் என அவர் பேசியிருப்பது அரசியல் வட்டாரத்தில் கவனம் பெற்றுள்ளது.
தவெக தேர்தல் பணிமனையில் நடைபெற்ற ஆலோசனைக் கூட்டத்தில் பேசிய சத்யபாமா, தனது அரசியல் பயணம் குறித்தும் விளக்கமளித்தார். அதிமுகவில் நல்ல தலைமை இல்லை என்ற காரணத்தால் தான் தமிழக வெற்றிக் கழகத்தில் இணைந்ததாக அவர் தெரிவித்தார். கட்சி மாறியவர் என்ற விமர்சனத்தை தன்னிடம் முன்வைக்க முடியும் என்றும், ஆனால் அதற்கான காரணம் தனக்கு தெளிவாக இருப்பதாகவும் அவர் கூறினார்.
மேலும், தாராபுரம் தொகுதியில் அதிமுக சார்பில் வேட்பாளராக அறிவிக்கப்பட்டுள்ள பானுமதி, தேர்தல் தேதி அறிவிக்கப்படும் வரை தவெகவில் இருந்ததாகவும் சத்யபாமா குறிப்பிட்டார். அதிமுகவில் சட்டமன்ற உறுப்பினர் பதவி வழங்கப்படும் என்ற தகவலின் அடிப்படையிலேயே அவர் அக்கட்சிக்கு சென்றதாகவும் சத்யபாமா தெரிவித்தார்.
தேர்தல் பணிகள் குறித்து நிர்வாகிகளுக்கு ஆலோசனை வழங்கிய அவர், ஒவ்வொரு குழுவும் சுமார் 50 வாக்காளர்களை இலக்காகக் கொண்டு பணியாற்ற வேண்டும் என்றார். அனைவரும் தவெகவிற்கு வாக்களிப்பார்கள் என்று எதிர்பார்க்க முடியாது என்றும், பிற கட்சிகளுக்கு ஆதரவாக உள்ள வாக்காளர்களை தங்களது பக்கம் கொண்டு வருவதற்கான முயற்சிகளில் நிர்வாகிகள் ஈடுபட வேண்டும் என்றும் அறிவுறுத்தினார்.
தாராபுரம் தொகுதியில் ஒரு லட்சம் வாக்குகள் வித்தியாசத்தில் வெற்றி பெற்று, அனைத்து கட்சிகளின் வேட்பாளர்களையும் டெபாசிட் இழக்கச் செய்ய வேண்டும் என்ற இலக்கையும் சத்யபாமா முன்வைத்தார்.
அதிமுக குறித்தும் பேசிய அவர், அந்த கட்சியில் நல்ல தலைவர்கள் இல்லை என்று தான் கூறவில்லை என்றும், முன்னாள் முதலமைச்சர் எம்ஜிஆர் நல்ல தலைவர் என்றும் குறிப்பிட்டார். கடந்த பல ஆண்டுகளாக திமுக மற்றும் அதிமுக ஆகிய கட்சிகள் சட்டமன்றத்தில் பல்வேறு கேள்விகளை எழுப்பியிருந்தாலும், தற்போதைய அரசியல் சூழலில் அதிமுக பொதுச்செயலாளர் எடப்பாடி பழனிசாமி தொடர்ந்து பல்வேறு கேள்விகளை எழுப்பி வருவதாகவும் அவர் விமர்சித்தார்.
திமுக ஆட்சியில் இருந்தபோது எதிர்க்கட்சித் தலைவராக இருந்த எடப்பாடி பழனிசாமி இதே அளவுக்கு கேள்விகளை எழுப்பவில்லை என்றும் சத்யபாமா கூறினார். இதனால் அப்போது தனக்கு சந்தேகம் ஏற்பட்டதாகவும், திமுக அத்தனை சுத்தமான ஆட்சியை நடத்தியதா என்ற கேள்வியும் எழுந்ததாகவும் அவர் தெரிவித்தார்.
தாராபுரம் தொகுதியில் அதிமுக மற்றும் திமுக வேட்பாளர்கள் இணைந்து தவெகவை வீழ்த்த முயற்சிப்பதாகவும், அவர்களின் முயற்சி ஒருபோதும் வெற்றி பெறாது என்றும் சத்யபாமா கூறினார். அதிமுக–திமுக இடையே ஏற்பட்டதாக கூறப்படும் அரசியல் புரிந்துணர்வு மற்றும் கூட்டணி பேச்சுவார்த்தைகளின் காரணமாகவே தான் அதிமுகவில் இருந்து விலகியதாகவும் அவர் தெரிவித்தார்.
இதனிடையே, 2026 சட்டசபைத் தேர்தலுக்குப் பிறகு தமிழக அரசியலில் ஏற்பட்ட மாற்றங்கள் காரணமாக தமிழக வெற்றிக் கழகம் ஆட்சி அமைத்ததாகவும், திமுக கூட்டணியில் இருந்த காங்கிரஸ் உள்ளிட்ட சில கட்சிகள் விஜய் தலைமையிலான அரசுக்கு ஆதரவு அளித்ததாகவும் குறிப்பிடப்பட்டுள்ளது. இதன் மூலம் பெரும்பான்மை உறுதி செய்யப்பட்டு சட்டசபையில் நம்பிக்கை வாக்கெடுப்பும் நடைபெற்றதாக கூறப்படுகிறது.
இந்த அரசியல் மாற்றங்களுக்குப் பிறகு அதிமுகவைச் சேர்ந்த சில சட்டமன்ற உறுப்பினர்கள் தங்களது பதவிகளை ராஜினாமா செய்து தவெகவில் இணைந்தனர். இதில் தாராபுரம் தொகுதி முன்னாள் எம்எல்ஏ சத்யபாமாவும் ஒருவர்.
தற்போது மதுராந்தகம் மற்றும் தாராபுரம் ஆகிய தொகுதிகளுக்கு இடைத்தேர்தல் அறிவிக்கப்பட்டுள்ளது. கடந்த தேர்தலில் தாராபுரம் தனித்தொகுதியில் அதிமுக சார்பில் போட்டியிட்ட சத்யபாமா வெற்றி பெற்றிருந்தார். அவரை எதிர்த்து திமுக சார்பில் இந்திராணி, தவெக சார்பில் கௌரி சித்ரா, நாம் தமிழர் கட்சி சார்பில் திவ்யா ஆகியோர் போட்டியிட்டனர்.
சுமார் 1.99 லட்சம் வாக்குகள் பதிவான அந்தத் தேர்தலில் சத்யபாமா சுமார் 81 ஆயிரம் வாக்குகள் பெற்று வெற்றி பெற்றார். திமுக வேட்பாளர் இந்திராணி சுமார் 64 ஆயிரம் வாக்குகளுடன் இரண்டாவது இடத்தையும், தவெக வேட்பாளர் கௌரி சித்ரா சுமார் 46 ஆயிரம் வாக்குகளுடன் மூன்றாவது இடத்தையும் பிடித்தனர். நாம் தமிழர் கட்சி வேட்பாளர் திவ்யா 6,026 வாக்குகளைப் பெற்றார்.
இந்நிலையில், தற்போது நடைபெறவுள்ள இடைத்தேர்தலில் தவெகவை வெற்றி பெறச் செய்ய வேண்டும் என்ற முனைப்புடன் சத்யபாமா உள்ளிட்ட கட்சி நிர்வாகிகள் தீவிர தேர்தல் பணிகளில் ஈடுபட்டு வருகின்றனர்.
