தமிழ் சினிமாவின் முன்னணி நடிகரான விஜய் நடித்துள்ள ஜனநாயகன் திரைப்படம் வரும் ஜனவரி 9ஆம் தேதி திரையரங்குகளில் வெளியாக உள்ளது. எச். வினோத் இயக்கியுள்ள இந்த படம், 2026 பொங்கல் பண்டிகையை முன்னிட்டு வெளியிடப்படுவதால், ரசிகர்கள் மத்தியில் பெரும் எதிர்பார்ப்பு நிலவுகிறது. விஜய் அரசியலில் களமிறங்கிய நிலையில், அவர் நடிக்கும் கடைசி படமாக ஜனநாயகன் கருதப்படுவதும் இந்த படத்திற்கான ஆர்வத்தை மேலும் அதிகரித்துள்ளது.
பூஜா ஹெக்டே, மமிதா பைஜு, பிரியாமணி, பாபி தியோல், கவுதம் மேனன், நரேன் உள்ளிட்ட பலர் முக்கிய கதாபாத்திரங்களில் நடித்துள்ளனர். அனிருத் இசையமைத்துள்ள இந்த படத்தின் பாடல்கள் வெளியாவதற்கு முன்பே ரசிகர்களிடையே பெரும் வரவேற்பைப் பெற்றுள்ளன. குறிப்பாக, சமீபத்தில் வெளியான முதல் பாடல் “தளபதி கச்சேரி” இணையத்தில் வைரலாகி, கோடிக்கணக்கான பார்வைகளைப் பெற்றது.
படம் வெளியாவதற்கு முன்பே சுமார் ரூ.300 கோடிக்கும் அதிகமாக வணிக ரீதியாக வசூல் செய்துள்ளதாக தகவல்கள் வெளியாகியுள்ளன. இதன் மூலம், ஜனநாயகன் படம் வெளியீட்டுக்கு முன்பே மிகப்பெரிய வர்த்தக வெற்றியைப் பதிவு செய்துள்ளது. படக்குழு அறிவித்ததன்படி, இசை வெளியீட்டு விழா மலேசியாவின் கோலாலம்பூரில் டிசம்பர் 27ஆம் தேதி நடைபெற உள்ளது. அதேபோல், படத்தின் டிரெய்லர் 2026 ஜனவரி 1ஆம் தேதி வெளியாகும் எனவும் கூறப்பட்டுள்ளது.
இந்த சூழலில், ஜனநாயகன் படத்தின் இரண்டாவது பாடலான “ஒரு பேரே வரலாறு” இன்று வெளியிடப்பட்டுள்ளது. பாடலாசிரியர் விவேக் எழுதியுள்ள இந்த பாடலை விஷால் மிஸ்ரா மற்றும் அனிருத் இணைந்து பாடியுள்ளனர். பாடல் வெளியான சில மணி நேரங்களிலேயே ரசிகர்களிடையே பெரும் வரவேற்பைப் பெற்று, சமூக வலைதளங்களில் வைரலாகி வருகிறது. விஜயின் கேரக்டரை உயர்த்திப் பேசும் வகையில் அமைந்துள்ள இந்த பாடல், படத்தின் மீதான எதிர்பார்ப்பை மேலும் உயர்த்தியுள்ளது.
ஜனநாயகன் படத்தின் ஒவ்வொரு அப்டேட்டும் ரசிகர்களிடையே பெரும் பரபரப்பை ஏற்படுத்தி வரும் நிலையில், பாடல் வெளியீடு படத்தின் பிரச்சாரத்தை இன்னும் வலுப்படுத்தியுள்ளது. படக்குழுவின் அடுத்த அறிவிப்புகளையும் ரசிகர்கள் ஆவலுடன் எதிர்நோக்கி வருகின்றனர்.
