சிவகங்கை அருகே பள்ளி மாணவர்களை ஏற்றிச் சென்ற வேனும் லாரியும் மோதிக்கொண்ட விபத்தில் பள்ளி வேன் ஓட்டுநர் உயிரிழந்தார். 9 மாணவர்கள் காயமடைந்தனர்.
சிவகங்கை அருகே சக்கந்தி பகுதியில் இருந்து மாணவர்களை ஏற்றிச் சென்ற பள்ளி வேன், கோமாளிபட்டி விளக்கு அருகே சென்றுகொண்டிருந்தது.
அப்போது கோமாளிபட்டி பகுதியில் செயல்பட்டு வரும் கனிம நிறுவனத்துக்கு செல்ல லாரி ஒன்று திரும்பியதாக கூறப்படுகிறது. அந்த நேரத்தில் பள்ளி வேனும் லாரியும் எதிர்பாராதவிதமாக நேருக்கு நேர் மோதியதாக முதற்கட்ட தகவல்கள் தெரிவிக்கின்றன.
மோதலின் தாக்கத்தில் பள்ளி வேன் கடுமையாக சேதமடைந்தது. விபத்தில் வேன் ஓட்டுநர் எத்திராஜ் பலத்த காயமடைந்தார். உடனடியாக மீட்கப்பட்ட அவர் மருத்துவமனைக்கு கொண்டு செல்லப்பட்ட நிலையில் உயிரிழந்தார்.
வேனில் பயணம் செய்த 9 பள்ளி மாணவர்களும் காயமடைந்தனர். அவர்கள் மீட்கப்பட்டு அருகிலுள்ள மருத்துவமனைகளில் சிகிச்சைக்காக அனுமதிக்கப்பட்டுள்ளனர்.
சம்பவம் குறித்து தகவல் அறிந்த போலீசார் மற்றும் மீட்புக்குழுவினர் சம்பவ இடத்துக்கு சென்று மீட்புப் பணிகளில் ஈடுபட்டனர்.
விபத்து எப்படி ஏற்பட்டது, லாரி திரும்பிய விதிமுறையில் தவறு இருந்ததா, வாகனங்களின் வேகம் உள்ளிட்ட அம்சங்கள் குறித்து போலீசார் விசாரணை நடத்தி வருகின்றனர்.
