தூத்துக்குடி:
தூத்துக்குடி மாவட்டம் விளாத்திகுளம் அருகேயுள்ள கிராமத்தில் பனை ஏறும் தொழிலாளி ஒருவர் பனை மரத்தில் தூக்குப்போட்டு தற்கொலை செய்துகொண்ட சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.
தற்கொலை செய்துகொண்ட சாலமோன்ராஜா
தூத்துக்குடி மாவட்டம், விளாத்திகுளம் அருகேயுள்ள கல்குமி கிராமத்தைச் சேர்ந்தவர் பெத்திலேகமணி. இவருடைய மகன் சாலமோன்ராஜா (வயது 66). பாரம்பரியத் தொழிலான பனை ஏறும் தொழிலைச் செய்து வந்த இவர், தனது மனைவி ஐனீஷ்மரியாளுடன் அதே கிராமத்தில் வசித்து வந்தார். இவர்களுக்கு இரண்டு மகன்கள் உள்ளனர்.
வழக்கம்போல் கடந்த சில நாட்களுக்கு முன்பு காலையில் பனை தொழிலுக்காக சாலமோன்ராஜா வீட்டைவிட்டுப் பனை தோப்பிற்குச் சென்றுள்ளார். இதற்கிடையே, மதிய உணவிற்காக வழக்கம் போல் அவர் நேரம் கடந்தும் வீட்டிற்குத் திரும்பவில்லை. இதனால் கணவர் மீது சந்தேகமும் கவலையும் அடைந்த அவரது மனைவி ஐனீஷ்மரியாள், தன் கணவரைத் தேடிக்கொண்டு அவர் வேலை செய்த பனை தோப்பிற்குச் சென்றுள்ளார்.
மனைவியை அதிர்ச்சியில் ஆழ்த்திய காட்சி
பனை தோப்பிற்குச் சென்று பார்த்த மனைவி ஐனீஷ்மரியாள அதிர்ச்சி காத்திருந்தது. சாலமோன்ராஜா பனை மரத்தில் தூக்குப்போட்டுத் தன் உயிரை மாய்த்துக்கொண்ட நிலையில் பிணமாகத் தொங்குவதைக் கண்டு அவர் கதறி அழுதார். அவரது அலறல் சத்தம் கேட்டு அப்பகுதியைச் சேர்ந்த அக்கம் பக்கத்தினர் ஓடிவந்து பார்த்து அதிர்ச்சியடைந்தனர்.
காவல்துறையின் விசாரணை
இந்தச் சம்பவம் குறித்து உடனடியாக விளாத்திகுளம் காவல் நிலையத்திற்குத் தகவல் தெரிவிக்கப்பட்டது. தகவலின் பேரில் விரைந்து வந்த விளாத்திகுளம் காவல்துறையினர், பனை மரத்தில் தொங்கிக் கொண்டிருந்த சாலமோன்ராஜாவின் உடலைக் கைப்பற்றிப் பிரேதப் பரிசோதனைக்காக விளாத்திகுளம் அரசு மருத்துவமனைக்கு அனுப்பி வைத்தனர்.
இந்தத் தற்கொலை சம்பவம் தொடர்பாகக் காவல்துறையினர் வழக்குப்பதிவு செய்து தீவிர விசாரணை நடத்தி வருகின்றனர். சாலமோன்ராஜா எதற்காக இந்த விபரீத முடிவை எடுத்தார்? குடும்பத் தகராறா அல்லது வேறு ஏதேனும் தனிப்பட்ட பிரச்சினையா? என்பது குறித்துக் காவல்துறையினர் பல்வேறு கோணங்களில் விசாரணையை முடுக்கி விட்டுள்ளனர்.
